धुळे (प्रतिनिधी) शेतात गहू काढत असताना अंगावर वीज पडल्याने ४८ वर्षीय ज्ञानेश्वर नागराज पाटील या शेतकऱ्याचा जागीच मृत्यू झाल्याची घटना जुनवणे शिवारात घडली आहे. तर केवळबाई देवराम मोरे (पाटील) यांच्यावर रुग्णालयात उपचार सुरू आहेत.
धुळे तालुक्यातील जुनवणे शिवारात ज्ञानेश्वर पाटील हे आपल्या परिवारासोबत राहत होते. जुनवणे शिवारातील त्यांच्या शेतात गहू पिकाची काढणी सुरू होती. त्याठिकाणी गावातील काही जण त्यांच्या सोबत शेतात होते. सायंकाळच्या सुमारास अचानक पावसाचे वातावरण तयार होत विजांचा कडकडाट सुरू झाला. याचवेळी विजांचा कडकडाट होऊन वीज थेट ज्ञानेश्वर पाटील आणि केवळबाई देवराम मोरे (पाटील) यांच्या अंगावर कोसळली. त्यांना तातडीने जखमी अवस्थेत धुळे येथील हिरे वैद्यकीय महाविद्यालयात दाखल करण्यात आले. हिरे वैद्यकीय महाविद्यालयातील डॉक्टरांनी ज्ञानेश्वर पाटील यांना तपासून मृत घोषित केले. तर केवळबाई यांच्यावर उपचार सुरू आहेत.
