जळगाव (प्रतिनिधी) येथील जी. एम. फाउंडेशन आणि खानदेश कैटरिंग असोसिएशन यांच्या संयुक्त विद्यमाने आणि मुख्यमंत्री सहायता निधी व धर्मदाय रुग्णालय मदत कक्ष यांच्या सहकार्याने पंडित प्रदीप मिश्रा यांच्या जन्मदिनानिमित्त मुख्यमंत्री सामुदायिक मोफत आरोग्य तपासणी शिबीर आणि रक्तदान शिबीर सोमवारी दि. १६ जून रोजी आयोजित करण्यात आले होते. या शिबिरात सुमारे ५२५ नागरिकांची विविध तज्ज्ञ डॉक्टरांच्या हस्ते तपासणी करण्यात आली. तर ६० जणांनी रक्तदान करून सामाजिक बांधिलकी जोपासली.
कार्यक्रमाच्या जिल्हा शल्यचिकित्सक डॉ. किरण पाटील, जी. एम फाउंडेशनचे आरोग्यदूत पितांबर भावसार, खान्देश केटरिंग असोसिएशनचे अध्यक्ष सत्यनारायण जोशी, उपाध्यक्ष गोपाल अग्रवाल, सचिव रतन सारस्वत मंचावर उपस्थित होते. सुरुवातीला डॉ. किरण पाटील यांच्या हस्ते शिबिराचे उदघाटन झाले. यावेळी सचिव रतन सारस्वत यांनी प्रस्तावना केली. राज्याचे मुख्यमंत्री देवेंद्र फडणवीस, जलसंपदा मंत्री गिरीश महाजन यांच्या मार्गदर्शनाखाली पूज्य पंडित प्रदीप मिश्रा यांच्या जन्मदिनाचे औचित्य साधून रक्तदान आणि आरोग्य तपासणी घेतले जात असल्याचे सारस्वत यांनी सांगितले.
आरोग्य तपासणीमुळे नागरिकांना वेळीच आजारांची माहिती मिळते. त्यामुळे त्यांना वेळेवर उपचार घेता येतात. शिबिराचा लाभ सर्व घटकातील नागरिकांनी घ्यावा असे प्रतिपादन डॉ. किरण पाटील यांनी केले. डॉ. किरण पाटील यांच्यासह मान्यवरांनी आरोग्य तपासणी सुरु असलेल्या विभागांना भेट देऊन नागरिकांशी संवाद साधला. प्रसंगी नागरिकांची कान-नाक-घसा, डोळे, बीपी, रक्त, जनरल, स्त्रीरोग, त्वचाविकार, दंतरोग यासह विविध तपासणी शिबिरात करण्यात आली आहे. ज्यांना शस्त्रक्रिया सांगितल्या आहेत, त्या सर्व योजनांमधून मोफत केल्या जाणार आहे.
पंडित मिश्रांचा भक्तांशी संवाद
कार्यक्रमात पंडित मिश्रा यांनी ऑनलाईन स्क्रिनवर भाविकांशी संवाद साधला. जन्मदिनानिमित्त शुभेच्छांचा स्वीकार करून भक्तांनी समाजात दीनदुबळ्यांची सेवा करीत राहा असे आवाहन भक्तांना केले. कार्यक्रमात विठ्ठलेश सेवा समिती, सिहोर येथील आणि महाराष्ट्राचे काम पाहणारे देविदास पाटील, राजेश सोनवणे, ममता माळी व इतर सदस्य उपस्थित होते. कार्यक्रमासाठी खान्देश केटरिंग असोसिएशनचे सहसचिव दिनेश टाटीया, खजिनदार राजेंद्र वैष्णव यांच्यासह सदस्यांनी परिश्रम घेतले. रक्तदान शिबिरात ६० नागरिकांनी रक्तदान केले.
