जळगाव (प्रतिनिधी) सुमणबाई इंस्टीट्यूट ऑफ फार्मसी बांबरुड (ता. पाचोरा) येथील विद्यालयातील चेअरमन हे फीसाठी छळ करत असून खोट्या गुन्ह्यात अडकवण्याची धमकी देत आहेत. तरी मला मदत करण्यात यावी, नाहीतर मला आत्महत्येशिवाय दुसरा पर्याय राहणार नाही, असे पत्र कृष्णा आबा मोरे या विद्यार्थ्याने राष्ट्रवादी काँग्रेस पक्षाचे सचिव अँड. कुणाल पवार, राष्ट्रवादी विद्यार्थी कॉंग्रेसचे प्रदेश सचिव भूषण संजय भदाणे यांना लिहिले आहे. या पत्रामुळे शैक्षणिक क्षेत्रात प्रचंड खळबळ उडाली आहे.
अँड. कुणाल पवार यांना लिहिलेल्या पत्रात म्हंटले आहे की, मी कृष्णा आबा मोरे सुमणबाई इंस्टीट्यूट ऑफ फार्मसी बांबरुड ता. पाचोरा या विद्यालयात शिकतो. अंतिम वर्ष डी-फार्मसीला आहे. मला आमच्या कॉलेजचे चेअरमन पोतदार फीसाठी त्रास देतात. माझी टोटल स्कॉलशीप आली असूनही माझ्याकडून ३० हजार रुपये मागत आहेत. ह्या लॉकडाउनमध्ये मी स्वतः भाजीपाला विकून घर चालवतोय. माझी परिस्थिती हलाकीची आहे. आणि पोतदार हे मला त्रास देताय. माझ्यावर विनाकारण गुन्हा दाखल केला आहे. असाच त्रास असेल तर माझ्याकडे आत्महत्येशिवाय दुसरा पर्याय नाही. तसेच पोतदार यांनी मला शिवीगाळ देखील केली आहे.
मला मदत करण्यात यावी, नाहीतर मला आत्महत्येशिवाय दुसरा पर्याय नाही, असे पत्रात म्हंटले आहे.
