जळगाव (प्रतिनिधी) मुंडे परिवाराचे काम आभाळा ऐवढे मोठे काम आहे. यामुळे त्यांच्या वारसदाराला कुठेतरी न्याय, सन्मान मिळेल अशी समाजाची अपेक्षा आहे. यामुळे पंकजा मुंडे या शिवसेनेत आल्या तर त्यांचे स्वागत राहिल, असे मत राज्याचे पाणी पुरवठ मंत्री तथा पालकमंत्री गुलाबराव पाटील यांनी व्यक्त केले आहे.
जळगाव तालुक्यातील किनोद येथे शुक्रवारी पालकमंत्री ना. गुलाबराव पाटील यांनी एका कार्यक्रमाला उपस्थित दिली. या कार्यक्रमानंतर ते माध्यमांशी बोलत होते. सध्या भाजपच्या नेत्या पंकजा मुंडे यांच्या समर्थकांनी त्यांनी शिवसेनेत प्रवेश करावा, अशी मागणी करत सोशल मीडियावर मोहीम सुरू केली आहे. यासंदर्भात पत्रकारांनी मंत्री ना. गुलाबराव पाटील यांना विचारणा केली असता त्यांनी आपले मत मांडले.
मंत्री ना. गुलाबराव पाटील म्हणाले की, २०१९ च्या विधानसभा निवडणुकीनंतर पंकजा मुंडे यांना भाजपकडून हवे तसे प्रतिनिधीत्व मिळाले नाही. मुळात गोपीनाथ मुंडे यांनी भाजपसाठी पडतीच्या काळात खूप मोठे काम केले आहे. आता मात्र त्यांच्या कन्या पंकजा मुंडे यांना प्रतिनिधित्वासाठी संघर्ष करावा लागत आहे. एकनाथ खडसे, चंद्रशेखर बावनकुळे व पंकजा मुंडे यांना भाजपने तिकीट दिले नव्हते. याचाच अर्थ ओबीसी समाजाचे भाजपकडून कुठेतरी खच्चीकरण केले जात आहे.
ती समाजाची अपेक्षा
पदाबाबत मुख्यमंत्री निर्णय घेतील पंकजा मुंडे यांना योग्य स्थान व प्रतिनिधित्व शिवसेनेत मिळेल अशी समाजाची अपेक्षा आहे. यामुळे पंकजा मुंडे यांनी शिवसेनेत प्रवेश केला तर त्यांचे स्वागतच राहील. प्रवेश केल्यानंतर त्यांना पद काय द्यायचे, हे मुख्यमंत्री उद्धव ठाकरे ठरवतील, असेही ना. गुलाबराव पाटील म्हणाले.
