नवी दिल्ली (वृत्तसंस्था) भारतात कोरोना संसर्गाच्या दुसऱ्या लाटेचा कहर पाहायला मिळत आहे. दररोज समोर येणारे कोरोनाबाधितांचे आकडे धडकी भरवणारे आहेत. दिवसागणिक कोरोनाबाधितांच्या संख्येत झपाट्यानं वाढ असून देशात गेल्या २४ तासांत भारतात ४,१४,१८८ नव्या कोरोनाबाधितांची नोंद झाली आहे. तर ३९१५ रुग्णांचा मृत्यू झाला आहे. तसेच ३ लाख ३१ हजार ५०७ रुग्ण उपचारावर मात करुन घरी परतले आहेत.
आरोग्य मंत्रालयाचनं जारी केलेल्या आकडेवारीनुसार, देशात आतापर्यंतच्या सर्वोच्च कोरोनाबाधित रूग्णांची नोंद झाली. गेल्या २४ तासांत तब्बल ४ लाख १४ हजार १८८ कोरोनाबाधित रूग्ण आढळले असून, मृत पावणाऱ्यांच्या संख्येतही मोठ्या प्रमाणात वाढ झाल्याचं पाहायला मिळालं, २४ तासांत एकुण ३ हजार ९१५ रूग्णांचा देशात कोरोनामुळे मृत्यू झाला आहे. आरोग्य यंत्रणा अपुरी पडत असल्याने देशात मृत्यू दरही झपाट्याने वाढत असल्याचं दिसून येत आहे. मागच्या २४ तासांत देशात ३ लाख ३१ हजार ५०७ रुग्ण कोरोनातुन बरे झाले आहेत. त्याचबरोबर, सध्या भारतात एकूण ३६ लाख ४५ हजार १६४ सक्रिय रूग्णसंख्या आहे.
१० दिवसांच्या कालखंडात कोणत्याही देशात इतक्या मोठ्या संख्येने मृत्यू होण्याचा हा उच्चांक आहे. जागतिक आरोग्य संघटनेने दिलेल्या माहितीनुसार, याआधी अमेरिकेत १० दिवसांत सर्वाधिक ३४ हजार ७९८ रुग्णांच्या मृत्यूची नोंद झाली होती. यानंतर ब्राझीलचा क्रमांक होता. ब्राझीलमध्ये ३२ हजार ६९२ मृत्यू झाले होते. पण भारताने अमेरिका आणि ब्राझीलला मागे टाकलं असून नकोसा उच्चांक नावावर झाला आहे.
महाराष्ट्र अद्यापही पहिल्या क्रमांकावर असून २४ तासांच ८५३ जणांच्या मृत्यूची नोंद झाली. उत्तर प्रदेश, दिल्ली आणि कर्नाटकमध्ये ३०० हून अधिक तर छत्तीसगडमध्ये २०० हून अधिक मृत्यू झाले. दरम्यान १०० हून अधिक मृत्यू झालेल्या राज्यांमध्ये उत्तराखंडसोबत तामिळनाडू, हरियाणा, राजस्थान, पंजाब, झारखंड, गुजरात आणि पश्चिम बंगाल यांचा समावेश आहे.
राज्यात गुरुवारी ६२,१९४ कोरोनाबाधित रुग्णांची वाढ
राज्यात काल तब्बल ६२ हजार १९४ कोरोनाबाधित रुग्णांचे निदान झाले. तर ६३ हजार ८४२ कोरोना रुग्णांना बरे झाल्यानंतर घरी सोडण्यात आले. राज्यात आजपर्यंत एकूण ४२२७,९४० कोरोना बाधित रुग्ण बरे झाले आहेत. यामुळे राज्यातील रुग्ण बरे होण्याचेप्रमाण ८५.५४% एवढा झाला आहे. तर आज राज्यात दरम्यान काल ८५३ कोरोनाबाधित रुग्णांनी आपला जीव गमावला आहे. सध्या राज्यातील मत्यूदर १.४९% एवढा आहे.
