नवी दिल्ली (वृत्तसंस्था) जेएनयू माजी विद्यार्थी नेता तसेच कम्युनिस्ट पार्टी ऑफ इंडियाचा कन्हैया कुमार आणि गुजरातचे अपक्ष आमदार जिग्नेश मेवाणी हे लवकरच काँग्रेसमध्ये प्रवेश करणार अशी चर्चा आहे. येत्या २८ सप्टेंबर रोजी त्यांचा पक्ष प्रवेश होईल, अशी माहिती सुत्रांच्या हवाल्यानं दिली आहे.
कन्हैया कुमारने काही दिवसांपूर्वी काँग्रेसचे माजी अध्यक्ष राहुल गांधी यांची भेट घेतली होती. त्यांच्या या भेटीमुळे कन्हैया काँग्रेसमध्ये प्रवेश करणार असल्याची चर्चा सुरु झाल्या होत्या. पण जिग्नेश मेवाणी यांनी काँग्रेसमध्ये प्रवेश करण्याचा निर्णय अचानक घेतल्याचं यामुळे दिसून आलं आहे. २०१९ साली कन्हैया कुमार बिहारमधील बेगुसराय मतदार संघातून भाजपविरोधात निवडणूक लढवली होती.
दरम्यान, या महिन्याच्या सुरुवातीला कन्हैया कुमारने सीपीआयच्या राष्ट्रीय कार्यकारिणीच्या बैठकीला उपस्थिती लावली होती. कन्हैय्या या कार्यक्रमात बोलला आणि चर्चेत देखील सहभाग घेतला होता, अशी माहिती सीपीआय नेते डी. राजा यांनी काही दिवसांपूर्वी दिली होती.
