धरणगाव (प्रतिनिधी) येथील क्रांतिकारी खाज्याजी नाईक स्मृती संस्थेचा पर्यटन क्षेत्र ‘क’वर्ग यादीत समावेश करण्यात आला असल्याची घोषणा पालकमंत्री गुलाबरावजी पाटील यांनी नुकतीच केली आहे.
जिल्हा नियोजन समितीची बैठक पालकमंत्री गुलाबराव पाटील यांच्या अध्यक्षतेखाली नुकतीच पार पडली. यावेळी जिल्ह्यातील प्रलंबित विषयांवर चर्चा झाल्यानंतर धरणगाव तालुक्यातील डॉ. हेडगेवार नगर ग्रामपंचायत मधील क्रांतिकारी खाज्याजी नाईक स्मृती स्थळास ‘क’ वर्ग तिर्थक्षेत्र /पर्यटन क्षेत्र दर्जा देण्याची पालकमंत्री गुलाबरावजी पाटील बैठकीत घोषित केले.
क्रांतिकारी खाज्याजी नाईक यांच्या जयंतीनिमित्त राज्यभरातील भिल्ल समाज बांधव येथे भेट देण्यासाठी येतात. त्यामुळे स्मृती स्थळास पर्यटन क्षेत्राचा दर्जा देण्यात यावी, अशी सतत मागणी समाज बांधवांकडून होत होती. त्याची दखल घेत पालकमंत्री गुलाबराव पाटील यांनी मान्यता दिल्याने समाधान व्यक्त होत असून ना.गुलाबराव पाटील यांचे क्रांतिकारी खाज्याजी नाईक स्मृती संस्था तसेच डॉ. हेडगेवार नगर ग्रामपंचायत मधील सर्व नागरिकांनी आभार मानले आहे.
