अमरावती (वृत्तसंस्था) ट्रकने दुचाकीला दिलेल्या धडकेत दुचाकीवरील शाळकरी विद्यार्थिनीचा मृत्यू झाला. तर तिची आई किरकोळ जखमी झाल्याची घटना, बुधवार, ६ सप्टेंबर रोजी सकाळी ९ वाजताच्या सुमारास मोशी- अमरावती मार्गावर घडली. श्रावणी आशिष तायवाडे (१२ रा. पंचायत समिती परिसर, मोर्शी असे मृतक विद्यार्थिनीचे नाव आहे.
श्रावणी ही शहरातील शांतिनिकेतन इंग्लिश स्कूलमध्ये इयत्ता सातव्या वर्गात शिकत होती. बुधवारी सकाळी आई कविता (३९) ह्या तिला दुचाकीने ट्युशनला सोडून देण्यासाठी जात होत्या. मार्गात साखर वाहून नेत असलेला ट्रक (एमएच ४६ एफ ५५६५) ने त्यांच्या दुचाकीला धडक दिली.
या अपघातात श्रावणी ही रस्त्यावर फेकली गेली. त्यात तिच्या पाय व डोक्याला जबर दुखापत होऊन मोठ्या प्रमाणात रक्तस्त्राव झाला. तर कविता ह्यासुद्धा किरकोळ त्यांच्या जखमी झाल्या. अपघाताबाबत माहिती मिळताच मोर्शी पोलिसांनी घटनास्थळ गाठून श्रावणीला तत्काळ उपजिल्हा रुग्णालयात दाखल केले.
प्राथमिक उपचारानंतर तिला जिल्हा सामान्य रुग्णालयात हलविण्यात आले. परंतु डॉक्टरांनी तिला मृत घोषित केले. या प्रकरणी मोर्शी पोलिसांनी ट्रकचालकाविरुद्ध गुन्हा दाखल करून त्याला ताब्यात घेण्यात आले असून ट्रक जप्त करण्यात आलाय. या घटनेने शहरात हळहळ व्यक्त होत आहे.
