धरणगाव (प्रतिनिधी) शहरातील मध्यवर्ती भागात सुरु असलेले झुमकराम वाचनालयाच्या बांधकामासंदर्भात माहिती अधिकारात मागण्यात आलेली माहिती देण्यास टाळा-टाळ होत असल्याची धक्कादायक माहिती समोर आली आहे. अॅड.शरद माळी यांनी याबाबतची माहिती मागितली आहे. त्यावर आता उद्या (मंगळवार) तिसरी सुनवाई होणार आहे.
यासंदर्भात अधिक असे की, अॅड.शरद माळी यांनी झुमकराम वाचनालयाच्या बांधकामासंदर्भात माहिती अधिकारात माहिती मागितली होती. त्यात प्रामुख्याने पालिकेच्या ठरावाची प्रत. तसेच जागेचा सिटीसीएस उतारा, संपूर्ण आलेल्या निविदा सहित इस्टीमेटच्या प्रति, नगररचना विभागाची मंजुरी प्रत, आरसीसी ड्रॉईंग प्रत तसेच ज्या व्यक्तीला निविदा दिली आहे, त्या व्यक्तीचे संपूर्ण कायदेशीर जीएसटी आणि आयकर परताव्याची माहिती. त्याच बरोबर वेळोवेळी मटेरियल टेस्टिंग होत असल्याचा अहवाल, भूकंप प्रतिरोधक ड्रॉईंग, वाचनालय आणि शॉपिंग कॉप्लेक्स एकत्र बांधण्याचा संबंध काय? बाबत माहिती. गावाच्या लोकसंख्येनुसार क नगरपालिकेच्या वाचनालयाचे क्षेत्रफळ आवश्यकतेनुसार कमी अथवा जास्त असल्याबाबतची माहिती. सदरची जागा वाचनालयासाठी आरक्षित असल्याची माहिती. ठेकेदारास दिलेले आदेश याची माहिती अॅड.माळी यांनी माहिती अधिकारात मागवली होती. परंतू यातील फक्त काही मुद्द्यांची माहिती देण्यात आली तर इतर मुद्द्यांची माहिती देण्यात आलेली नाही. त्यामुळे पालिका प्रशासन मुद्दाम काही लपवू इच्छित आहे का? असा प्रश्न उपस्थित केला जात आहे.
दरम्यान, अॅड.शरद माळी यांचे म्हणणे आहे की, वाचनालयाचे सुरु असलेले बांधकाम हे चार सिटीएस नंबर एकत्र करून सुरु आहे. वास्तविक बघता चार सिटीएस क्रमांक एकत्र करण्यासाठी परवानगी घ्यावी लागते. यातील दोन सिटीएस क्रमांकांवर महात्मा फुले हायस्कूलचे आरक्षण होते, अशी माहिती मिळाली होती. परंतू याबाबत पालिकाच अधिकृत माहिती देऊ शकते. याबाबतही माहिती देण्यास पालिका प्रशासन टाळाटाळ करतेय. वास्तविक बघता वाचनालयाच्या ठिकाणी शांतता हवी असते, मग त्याच ठिकाणी शॉपिंग कॉम्प्लेक्स बांधण्याचा उद्देश काय?, असा प्रश्न याठिकाणी अॅड.माळी यांनी उपस्थित केला आहे. याबाबत उद्या तिसरी सुनवाई असून माहिती न मिळाल्यास वाचनालयाचे बांधकाम स्थगित करून आपण पुढील अपील नाशिक येथे करणार असल्याचेही अॅड.माळी यांनी सांगितले.
