धुळे (प्रतिनिधी) केंद्र सरकारच्या इंधन दरवाढीच्या विरोधात धुळे शहरातील बारा फत्थर येथील शिवाजी महाराजांच्या पुतळ्यास पुष्पहार अर्पण करून राष्ट्रवादी युवक काँग्रेस पक्षाने निषेध मोर्चाची सुरुवात केली. यावेळी ‘आब की बार महंगाई पर वार’ म्हणत बैलगाडीवरून दुचाकी मोर्चा काढत हे अभिनव आंदोलन करण्यात आले.
पेट्रोल नसलेली दुचाकी आंदोलकांनी बैलगाडी वर ठेऊन हा मोर्चा काढला आहे. केंद्र सरकारने गेल्या कित्येक महिन्यांपासून सुरू असलेली इंधन दरवाढ थांबवावी व सर्वसामान्य नागरिकांची पिळवणूक देखील थांबवावी अशी मागणी यावेळी राष्ट्रवादी युवक काँग्रेस पक्षाच्यावतीने आंदोलकांनी केली आहे. राष्ट्रवादी युवक काँग्रेस पक्षाच्यावतीने सामील झालेल्या सर्व आंदोलकांनी केंद्र सरकारच्या विरोधामध्ये मोठ्या प्रमाणात घोषणाबाजी करून आपला तीव्र संतापही व्यक्त केला आहे. मोर्चामध्ये मोठ्या संख्येने राष्ट्रवादी युवक काँग्रेस पक्षाचे पदाधिकारी व कार्यकर्ते उपस्थित होते.
