नवी दिल्ली (वृत्तसंस्था) कोरोनाच्या विषाणूचा धोका संपलेला नसल्यानं आणखी सहज, सोप्या उपचारांवर संशोधन सुरूच आहे. त्या आघाडीवर शास्त्रज्ञांनी आणखी एक यश मिळवलं आहे. आता कोरोना विषाणूच्या संसर्गावर मात करण्यासाठी अँटीव्हायरल गोळ्या उपलब्ध झाल्या आहेत. इंग्लंडने अँटीव्हायरल गोळीच्या सशर्त वापरास मान्यता दिली आहे. या औषधाचे नाव ‘मोल्नुपिरावीर’ आहे.
कोविडचा सौम्य संसर्ग असलेल्या लोकांना ही गोळी दिवसातून दोनदा घ्यावी लागेल. ही अँटीव्हायरल गोळी कोरोनाची लक्षणे कमी करते आणि लवकर बरे होण्यास मदत करते. रुग्णालयांवरील ताण कमी करण्यासाठी आणि गरीब देशांमध्ये संसर्ग रोखण्यासाठी हे उपयुक्त ठरू शकते. ही गोळी साथीच्या रोगाशी लढण्यासाठी आवश्यक असलेल्या दोन पद्धती, औषधोपचार आणि प्रतिबंध यासाठी उपयुक्त ठरेल. इंग्लंडचे आरोग्य मंत्री साजिद जाविद म्हणाले, आमच्या देशासाठी हा एक ऐतिहासिक दिवस आहे. इंग्लंड जगातील पहिला देश आहे ज्याने अशा अँटीव्हायरसला मान्यता दिली आहे जे कोरोनावर उपचारासाठी घरीच घेतल्या जाते.
अमेरीका, युरोप आणि इतर काही देशांतील संबंधित या औषधाचा आढावा घेत आहेत. अमेरीकेच्या फूड अँड ड्रग अ‍ॅडमिनिस्ट्रेशनने गेल्या महिन्यात सांगितले की, ते गोळीची सुरक्षा आणि परिणामकारकता शोधण्यासाठी नोव्हेंबरच्या अखेरीस पॅनेलची बैठक बोलावतील. औषध निर्माता कंपनी ‘मर्क’ने हे औषध विकसित केले आहे. ऑक्टोबरमध्ये इंग्लंड अधिकाऱ्यांनी जाहीर केले होते की त्यांनी ‘मोल्नुपिरावीर’चे ४,८०,००० डोस मिळवले आहेत आणि या हिवाळ्यात आणखी हजारो लोकांवर उपचार करण्यात मदत होण्याची त्यांना अपेक्षा आहे.
