सोलापूर (वृत्तसंस्था) निवृत्त डीवायएसपीने मुलीसमान सुनेवर बलात्कार केल्याची संतापजनक घटना उघडकीस आली आहे. याप्रकरणी विजापूर नाका पोलीस ठाण्यात दोघा बापलेकाविरूध्द गुन्हा दाखल झाला आहे.
महाविद्यालयात ने-आण करतांना पडली वाईट नजर !
सासऱ्याने दुष्कर्म केल्याची फिर्याद एका सुनेने विजापूर नाका पोलिस ठाण्यात दिली आहे. त्यावरून एका निवृत्त पोलिस उपअधीक्षकावर आणि त्याच्या मुलावर गुन्हा दाखल झाला आहे. १२ जून रोजी विजापूर नाका पोलिसात गुन्हा दाखल करण्यात आला आहे. पीडितेचा निवृत्त डीवायएसपीच्या शिक्षक मुलाबरोबर एक वर्षांपूर्वी विवाह झाला होता. पीडिता महाविद्यालयीन शिक्षण घेत होती. तिला महाविद्यालयात शिक्षणासाठी ने-आणची जबाबदारी सासऱ्यावर होती.
घरात एकटी असताना जबरदस्ती अत्याचार !
सासऱ्याने ऑगस्ट २०२२ मध्ये सून घरात एकटी असताना जबरदस्ती बलात्कार केला. तसेच याबाबत कुणालाही काहीही सांगितल्यास घरातून हाकलून देण्याची धमकी दिली. त्यामुळे भेदरलेल्या पिडीतेने ही बाब कुणालाही सांगितली नाही. परंतू याचा गैरफायदा घेत सासऱ्याने दुसऱ्यांदा सुनेवर अत्याचार केला. यानंतर मात्र, पिडीतेने हिंमत करून आपल्या पतीला सर्व हकीगत सांगितली. सासरे हे वारंवार लैंगिक अत्याचार करण्याचा प्रयत्न करत आहेत. दोन वेळा बळजबरीने अत्याचार केला असल्याचे पतीला सांगितले. मात्र पतीने पिडीतेवर खोटारडेपणाचा आळ घेत वडिलांची बदनामी करते म्हणून शारीरिक व मनसिक छळ चालविला. तसेच तिला माहेरी हाकलून दिले. नंतर तिला नांदविण्यासाठी परत आणले नाही, असेही पिडीतेने आपल्या तक्रारीत म्हटले आहे.
