मुंबई (वृत्तसंस्था) बाॅलिवूड अभिनेत्री शिल्पा शेट्टीचा पती उद्योजक राज कुंद्राला अटक करण्यात आली असून सध्या त्याच्यावर गंभीर आरोप करण्यात येत आहेत. अशातच आता या प्रकरणातील उमेश कामत नावामुळे चांगलाच गोंधळ उडाला आहे. उमेश कामत याचा नामसाधर्म्याखेरीज काहीही संबंध नाही. परंतु काही माध्यमांनी याची शहानिशा न करता आरोपी उमेश कामत म्हणून कलाकार उमेश कामतचा फोटो वापरला नी उमेशला विनाकारण प्रचंड मन:स्तापाला सामोरे जावं लागलं.
मराठी अभिनेता उमेश कामतनं सोशल मीडियावर एक पोस्ट शेअर केली आहे. त्यात त्यानं म्हटलं आहे की ‘आज राज कुंद्रा प्रकरणात चालवण्यात आलेल्या बातमीमध्ये या प्रकरणातील आरोपी ‘उमेश कामत’ याचा फोटो म्हणून माझा फोटो लावला जातो आहे. कुठलीही शहानिशा न करता वृत्तवाहिन्यांनी या प्रकरणात माझा फोटो लावून माझी बदनामी केली आहे. या प्रकारामुळे होणाऱ्या माझ्या वैयक्तिक, व्यावसायिक आणि सामाजिक हानीसाठी या वृत्तमाध्यमांना जबाबदार धरले जाईल. या प्रकरणी संबंधित मी योग्य ती कायदेशीर कारवाई निश्चितच करेन.’
अश्लील व्हिडीओ प्रकरणी राज कुंद्राचा एक्स मॅनेजर उमेश कामत याचं नाव समोर आलं आहे, मात्र काही माध्यमांनी बातम्या देताना चुकून मराठी अभिनेता उमेश कामतचा फोटो बातम्यांमध्ये वापरला आहे. त्यावरुन अभिनेता उमेश कामतने या वृत्तवाहिन्यांना कारवाईचा इशारा दिला आहे.
