बोदवड (प्रतिनिधी) नांदेड जिल्ह्यातील बोंढार गावातील अक्षय भालेराव हत्येच्या निषेधार्थ बोदवडला नुकताच जन आक्रोश मोर्चा काढण्यात आला.
नांदेड जिल्ह्यातील बोंढार गावात डॉ. बाबासाहेब आंबेडकर यांची जयंती साजरी केली म्हणून बोंढार गावातील जातीवादी गाव गुंडांनी अक्षय भालेराव या बौद्ध तरुणाचा निर्घृणपणे खून केला. अक्षय भालेरावच्या मारेकऱ्यांना फाशीची शिक्षा झाली पाहिजे. आरोपीवर ॲट्रॉसिटी ॲक्ट प्रमाणे गुन्हा दाखल केला पाहिजे, यासाठी बोदवड तालुक्यातील आंबेडकरवादी तरुणांनी अक्षय भालेराव यांच्या हत्येच्या निषेधार्थ जनआक्रोश मोर्चा आयोजित केला होता.
मोर्चा कृषी उत्पन्न बाजार समिती येथून निघून डॉ .बाबासाहेब आंबेडकर यांच्या पुतळ्यास पुष्पहार अर्पण करून तहसील कार्यालयात तहसीलदार अनिल वाणी यांना निवेदन देण्यात आले. यात बोदवड तालुक्यातील महिला पुरुष व तरुण सहभागी झाले होते.
