जळगाव (प्रतिनिधी) कुशीनगर एक्सप्रेसमध्ये भल्या पहाटे एका प्रवाशाच्या बॅगने अचानक पेट घेतल्याने एकच खळबळ उडाली. मात्र तरूणाने प्रसंगावधान दाखवत आग विझवून बॅगे बाहेर फेकली. यामुळे मोठा अनर्थ टळला.
लोकमान्य टिळक टर्मिनस येथून गोरखपुरच्या दिशेने जाणारी कुशीनगर एक्सप्रेस मधील इंजिनपासून तिसऱ्या क्रमांकाच्या जनरल बोगीमध्ये नांदगाव ते न्यायडोंगरी रेल्वे स्थानकादरम्यान पहाटे साडेपाच वाजेच्या सुमारास जनरल बोगीमध्ये वरच्या बर्थवर ठेवलेल्या बॅगेतून अचानक आवाज येवुन स्पार्किंग झाली. क्षणार्धात बॅगेला आग लागली. बॅगेजवळ बसलेल्या एका प्रवाशाने बॅग खाली फेकली. व खाली बसलेल्या अजय अशोक मगरे याच्या अंगावर ती बॅग पडली. अजयने पायाच्या सहाय्याने आग विझविण्याच्या प्रयत्न केला असता त्याच्या पायाला किरकोळ इजा झाली. याच दरम्यान सह प्रवाशांनी चैन पुलिंग करुन गाडी थांबवली. अजय याने सदरची बॅग गाडी बाहेर फेकल्याने पुढील अनर्थ टळला.
दरम्यान आरपीएफ यांनी बोगी चेक करुन गाडी पाचोरा रेल्वे स्थानकावर आल्यानंतर अजय मगरे यास पाचोरा ग्रामीण रुग्णालयात दाखल करण्यात आले. पाचोरा ग्रामीण रुग्णालयात चाळीसगाव पोलिसांनी अजय मगरे यांच्याकडून घटनाक्रम ऐकून जबाब नोंदवला आहे. नांदगाव ते न्यायडोंगरी रेल्वे स्थानकादरम्यान पेट घेतलेल्या बॅगेत नेमके होते तरी काय? याची पाहणी करण्यासाठी घटनास्थळी नाशिक येथील फॉरेंन्सिक टीम दाखल झाली असून बॅगेची सखोल चौकशी सुरु आहे. तसेच श्वानपथकाला देखील घटनास्थळी पाचारण करण्यात आले होते.
