जळगाव प्रतिनिधी : राज्य उत्पादन शुल्क विभागाने अवैध मद्य तस्करीविरुद्ध मोठी कारवाई करत चाळीसगाव ते मालेगाव रस्त्यावरील देवळी शिवार परिसरातून सुमारे १२ लाख ९१ हजार १०० रुपयांचा मुद्देमाल जप्त केला आहे. या कारवाईत दमण बनावटीच्या विदेशी मद्यासह एक मारुती सुझुकी अर्टीगा कार जप्त करण्यात आली असून दोन आरोपींना अटक करण्यात आली आहे.
राज्य उत्पादन शुल्क विभागाचे आयुक्त राजेश देशमुख, जळगाव जिल्हाधिकारी रोहन घुगे आणि नाशिक विभागीय उपायुक्त उषा वर्मा यांच्या मार्गदर्शनाखाली ही मोहीम राबवण्यात आली. निरीक्षक के. एन. गायकवाड आणि त्यांच्या पथकाला चाळीसगाव-मालेगाव मार्गावरून अवैध मद्याची वाहतूक होणार असल्याची गुप्त माहिती मिळाली होती. त्यानुसार १२ फेब्रुवारी २०२६ रोजी देवळी शिवारात सापळा रचण्यात आला.
जप्त केलेला मुद्देमाल
तपासादरम्यान एमएच-१८, सीई ८३०३ क्रमांकाच्या पांढऱ्या रंगाच्या मारुती अर्टीगा कारची झडती घेतली असता, त्यात महाराष्ट्र राज्यात प्रतिबंधित असलेला आणि केवळ दमण येथे विक्रीसाठी उपलब्ध असलेला खालील मद्यसाठा मिळून आला. यात रॉयल स्टॅग व्हिस्कीः १७४ बाटल्या (किंमत रु. ४३,५००), इम्पेरीयल ब्लू व्हिस्की ९६ बाटल्या (किंमत रु. २१,१२०), मॅकडॉल नं. ०१ व्हिस्की ८४ बाटल्या (किंमत रु. १८,४८०), मारुती अर्टीगा कारः (किंमत रु. १२ लाख) मोबाईल संच मोटोरोला आणि ओप्पो कंपनीचे २ महागडे फोन आदी हस्तगत करण्यात आले आहे.
दोन आरोपींना अटक
या प्रकरणी वाहन चालक सचिन भिकन पाचपुते (वय २७) आणि मिथुन महादू मोरे (वय ४०), दोघे राहणार विंचूर, जि. धुळे यांना ताब्यात घेण्यात आले आहे. त्यांच्याविरुद्ध महाराष्ट्र दारूबंदी अधिनियमांतर्गत गुन्हा दाखल करण्यात आला आहे. ही यशस्वी कारवाई अधीक्षक डॉ. व्ही. टी. भूकन यांच्या मार्गदर्शनाखाली निरीक्षक के. एन. गायकवाड, बी. डी. बागले, बी. एन. पाटील, व्ही. बी. परदेशी आणि एम. डी. पाटील यांच्या पथकाने केली. या कारवाईमुळे अवैध मद्य तस्करांचे धाबे दणाणले असून, प्रकरणाचा पुढील तपास सुरू आहे.
