सातारा (वृत्तसंस्था) कोरेगाव तालुक्यातील वाठार पोलीस ठाण्याच्या हद्दीतील एका गावात अल्पवयीन भावानेच बहिण भावाच्या नात्याला काळीमा फासत आपल्या स्वतःच्या लहान बहिणीवर अत्याचार केल्याची घटना उघडकीस आली.
वाठार पोलिसांनी दिलेल्या माहितीनुसार, पीडित मुलीचे शिक्षण इयत्ता सातवी पर्यंत झाले असून ती मागील काही वर्षात शाळा सोडून घरीच राहत होती. घरची परिस्थिती हालाखीची असल्याने घरातील आई-वडील मोलमजुरी करण्यासाठी दिवसभर घराबाहेर असायचे. पीडीतेचा भाऊ राहायला मामाकडे परगावी होता. गावी आल्यानंतर घरात कोणी नसल्याचा फायदा घेऊन पिढीतेच्या भावाने पीडित मुलीला दमदाटी, जीवे मारण्याची धमकी देत अत्याचार केला.
पिडीतेच्या हाता पायाला सूज आल्याने आईने तिला शासकीय रुग्णालयात नेले. त्या ठिकाणी वैद्यकीय तपासणी झाल्यानंतर पीडित अल्पवयीन मुलगी गरोदर असल्याची माहिती वैद्यकीय अधिकाऱ्याने पीडित मुलीच्या आईला व पोलिसांना कळवली. त्यानंतर सदर प्रकार समोर आला.
पोलिसांनी तत्परता दाखवत अल्पवयीन भावास ताब्यात घेतले. त्या मुलास सातारा येथे बालन्यायमंडळ या ठिकाणी हजर केले असता त्यास बालन्याय मंडळाने अभिरक्षा सुनावली आहे. अधिक तपास पोलीस उपनिरीक्षक संदीप बनकर करीत आहेत. याबाबतचे वृत्त आज एका दैनिकाने प्रसिद्ध केले आहे.
