नाशिक (वृत्तसंस्था) डीजे लावण्यासह अनावश्यक खर्च केला जात असेल तर अशा निकाहवर बहिष्कार टाकण्याचा निर्णय घेतला आहे. चुकीच्या गोष्टींपासून समाजास परावृत्त करण्यासाठी नायब शहर-ए-काझी सय्यद एजाजुद्दीन काझी यांनी विशेष मोहीम सुरू केली अाहे. तसेच, कमी खर्चात साध्या पद्धतीने निकाह करण्याची विशेष मोहीम सुरू केली असून याबाबत शहरात जनजागृतीही केली जात आहे.
परिस्थिती नसल्याने समाजातील अनेक मुलींचे वय वाढूनही त्यांचा निकाह होत नाही. हे टाळण्याची देखील मोहीम हाती घेण्यात आली आहे. मुस्लिम धर्मात निकाहवेळी मुलीच्या कुटुंबीयांवर आर्थिक संकट ओढवू नये, आर्थिक देवाणघेवाणीवरून शुभकार्यात अडथळा येऊ नये यासाठी साध्या पद्धतीने निकाह करण्याची शिकवण आहे. आधुनिक काळात अनेकांनी निकाहचा अर्थ बदलून टाकला अाहे. डीजे वाजवून जल्लोषाने जागा घेतली आहे. अशा गोष्टी समाजाने टाळल्या पाहिजेत. त्यामुळे साध्या पद्धतीने निकाह करावा. भेटवस्तू, आहेर, हुंडा या प्रथांना आळा घालावा. वाचलेल्या पैशांतून मुलीचे भविष्य कसे घडवता येईल हे पहावे. तिच्या नावावर ठेवी ठेवणे, शिक्षण, रोजगारासाठी त्या रकमेचा वापर करून मुलगी स्वावलंबी होण्यास मदत करता येईल. खाद्यपदार्थांवर अधिक खर्च करू नये. डीजेवर बंदीसह वाजंत्री, सजावट भेटवस्तू देणे-घेणे, आहेर असा अवाजवी खर्च टाळावा. मुलीचा हक्क आणि सुरक्षा यासाठी मेहरची अधिक रक्कम असावी. शरियत कायद्यानुसार साध्या पद्धतीने निकाह करावा. सामुदायिक विवाहास प्राधान्य द्यावे, कमीतकमी लोकांच्या उपस्थितीत निकाह करावा. साखरपुड्यातच निकाहाचे नियोजन करावे, अशी जनजागृती केली जात आहे.
