बोदवड (प्रतिनिधी) तालुक्यातील एणगाव येथील अवैध धंदे बंद करा अन्यथा पोलीस अधीक्षक कार्यालयासमोर उपोषण करू असा इशारा संतप्त महिलांनी दिला आहे. महिलांनी अवैध दारू विक्री बाबत पोलीस अधीक्षक यांच्याकडे निवेदन पाठवले आहे.
या निवेदनात असे नमूद आहे की, एणगाव येथे दारुचे अवैध धंदे जोरात चालु आहे. त्यामुळे आमचे संसार ध्वस्त होत आहेत. आमच्या लहान मुलांवर त्याचे वाईट परिणाम दिसून येत आहेत. ते सुद्धा व्यसनाधीन होत असल्यामुळे त्यांचे भविष्य खराब होत आहे. त्याकरीता आम्ही महिलांनी बोदवड पोलिस ठाण्यात १२ सप्टेंबर रोजी दारूचे अवैध धंदे सुरु असल्याबाबतची तक्रार देण्यासाठी गेलो होती. परंतू आमची आमची लेखी तक्रार घेतली नाही. तोंडी सांगण्यावरून संबंधित पोलिस कर्मचारी हे महिलांना घेवून एणगांव गावात गेले होते. दारुचे अवैध धंदे चालवत असणाऱ्यांचे नावे सांगून देखील त्यांच्यावर कारवाई केली नाही. उलट सुलट पोलिस कर्मचारी हे महिलांनाच प्रश्न विचारत पोलिस दबावतंत्राचा वापर महिलांवर करीत आहे.
यामुळे सदर अवैध दारु विक्री करणाऱ्या वर गुन्हे दाखल करण्यात यावे, अन्यथा आम्ही एणगाव येथील महिला जळगाव येथील पोलिस अधिक्षक याचे कार्यालयासमोर आमरण उपोषण करणार आहे. होणाऱ्या परिणामास आपले पोलिस प्रशासन हे सर्वस्वी जबाबदार राहणार आहे. भविष्यात आमच्यावर व आमच्या कुटुंबातील लोकांचे काही बरे-वाईट झाल्यास त्यास अवैध धंदे करणारे हेच जबाबदार राहतील. याची सुध्दा नोंद घ्यावी, असेही या निवेदनात नमूद केले असून या निवेदनावर वंचित बहुजन आघाडीच्या प्रमिला बोदडे, सविता पाटील, शैला पाटील यांच्यासह सुमारे सत्तर महिलांच्या स्वाक्षऱ्या आहेत. या निवेदनाची प्रत उपविभागीय पोलीस अधिकारी मुक्ताईनगर, पोलीस निरीक्षक बोदवड यांना सुद्धा देण्यात आल्या आहेत.
