नाशिक (वृत्तसंस्था) देवळा मनमाड मार्गावर एसटीला भीषण अपघात झाला आहे. या अपघातात कंडक्टरसह प्रवासी महिलेचा मृत्यू झाला आहे. तर अन्य जखमी प्रवाशांना रुग्णालयात दाखल करण्याचे काम सुरु आहे. जखमींपैकी काहींची प्रकृती गंभीर असल्याने मृतांचा आकडा वाढण्याची शक्यता वर्तवण्यात येत आहे.
मनमाड आगाराची बस मनमाड आगारातून नांदुरीकडे गेली होती. परतीच्या प्रवासात असताना चांदवड शिवारातील मतेवाडीजवळ हा भीषण अपघात झाला. समोरुन येणाऱ्या वाहनाने कट मारल्यानंतर एसटीचा रॉड तुटल्यामुळे चालकाचे नियंत्रण सुटले आणि एसटी बस थेट समोरील झाडावर आदळून अपघात झाला. अपघातात सारिका लहिरे या महिला कंडक्टरचा जागीच मृत्यू झाला तर एका महिला प्रवाशाचा उपचारा दरम्यान मृत्यू झाला आहे. तर बसमधील 20 ते 22 प्रवासी गंभीर जखमी झाले आहेत. यातील काही जखमींची प्रकृती गंभीर असल्याचे कळते. हा अपघात एवढा भीषण होता की, बसची एक बाजू चक्काचूर झाली आहे.
