एरंडोल (प्रतिनिधी) धरणगाव रस्ता कोठे आहे? असे विचारून मोटारसायकलवरून आलेल्या तीन अज्ञात चोरट्यांनी मॉर्निंग वॉकसाठी गेलेल्या ६९ वर्षीय वृद्धेच्या गळ्यातील सोन्याचे मंगळपोत ओढून पसार झाले. ही घटना गुरुवारी सकाळी ६.३० वाजेच्या सुमारास शासकीय विश्रामगृहासमोरील रस्त्यावर घडली.
परदेशी गल्लीमधील रहिवासी श्रीमती विमलबाई लक्ष्मण चौधरी ह्या नेहमीप्रमाणे सकाळी शासकीय विश्रामगृहासमोरील रस्त्यावर फिरायला गेल्या होत्या. विमलबाई चौधरी ह्या विश्रामगृहाच्या पुढे चालत असतांना मोटार सायकलवरून तीन युवक आले आणि त्यांच्या जवळ थांबून धरणगाव रस्ता कोठे आहे?. तसेच दुसरा रस्ता कोणता आहे?, असे विचारले. त्यानंतर विमलबाई चौधरी माहीती देवून पुढे चालत असतांना मोटार सायकलवरील दोन जन पुढे निघून गेले व मागे असलेल्या युवकाने विमलबाई चौधरी यांच्या गळ्यातील ३५ ग्रॅम वजनाची सोन्याची मंगलपोत ओढण्याचा प्रयत्न केला.
विमलबाई चौधरी यांनी त्यास प्रतिकार केला असता त्यांना खाली पाडून मंगलपोत ओढली आणि जवळच असलेल्या मक्याच्या शेतातून पळ काढला. याचवेळी दत्त मंदिराकडून येत असलेल्या करण परदेशी याने दुचाकी वरील युवकांना पकडण्याचा प्रयत्न केला. मात्र झटापटीत मोटारसायकलवरील एका युवकाचा मोबाईल खाली पडला व ते पळून गेले. विमलबाई चौधरी यांनी चोरट्यांना प्रतिकार करून मंगलपोत घट्ट धरून ठेवल्यामुळे अर्धवट तुटलेली सुमारे सतरा ग्रॅम वजनाची ७२ हजार रुपये किंमतीची सोन्याची पोत चोरट्यांनी लांबवली तर उर्वरित पोत विमलबाई चौधरी यांच्या साडीत अडकल्यामुळे सुरक्षित राहिली.
