वॉशिंग्टन (वृत्तसंस्था) अफगाणिस्तानवर तालिबानने कब्जा केल्यानंतर अफगाण अशरफ घनी जीव वाचवत पळाले. यावर अमेरिकेचे अध्यक्ष जो बायडन यांनी सडकून टीका केलीय. अफगाणिस्तानमधील राजकीय नेत्यांनी लवकर हार मानली आणि ते देश सोडून पळून गेले, असं मत जो बायडन यांनी व्यक्त केलं. तसेच अफगाणिस्तानमध्ये युद्धजन्य परिस्थिती आमच्या अपेक्षेपेक्षा फारच लवकर निर्माण झाली, अशी कबुलीही बायडेन यांनी दिली.
व्हाइट हाऊसमधील इस्ट रुममधून बायडेन यांनी अफगाणिस्तानमधील संघर्षाच्या पार्श्वभूमीवर देशाला संबोधित केलं. अफगाणिस्तानमध्ये अशरफ घनी यांचं सरकार पडून तालिबानच्या हातात संपूर्ण देश गेल्यानंतर बायडेन यांचं हे पहिलं भाषण होतं. बायडेन यांनी सध्याच्या अफगाणिस्तानमधील परिस्थितीसाठी अफगाणी नेत्यांना जबाबदार धरलं आहे. अफगाणी नेत्यांनी संघर्ष न करता हार मानली आणि देश सोडून पळून गेल्याचं मत बायडेन यांनी व्यक्त केलं आहे.
“मी माझ्या निर्णयावर ठाम आहे. २० वर्षानंतर मला एक गोष्ट समजली की अफगाणिस्तानमधून अमेरिकन लष्कर परत बोलवण्यासाठी योग्य अशी कोणतीच वेळ नव्हती. यामागील धोक्याची आम्हाला जाणीव होती. मात्र खरं सांगायचं झाल्यास सर्व घटना या आम्हाला अपेक्षित होतं त्यापेक्षाही अल्पावधीत घडल्या. तर तिथे झालं काय यासंदर्भात बोलायचं झाल्यास अफगाणिस्तानमधील राजकीय नेत्यांनी लवकर हार मानली आणि ते देश सोडून पळून गेले. अफगाणिस्तानचं लष्करही कोलमडलं,” असं बायडेन यांनी म्हटलं आहे.
बायडेन म्हणाले की, २० वर्षांपूर्वी आम्ही ११ सप्टेंबर २००१ च्या हल्लेखोरांना पकडण्याच्या उद्देशानं आम्ही अफगाणिस्तानात आलो. अफगाणिस्तानला तळ बनवून अल कायदा पुन्हा आपल्यावर हल्ला करू शकणार नाही याचीही आम्हाला खात्री करायची होती. आम्ही आमचे ध्येय साध्य करण्यात पूर्णपणे यशस्वी झालो आहोत. आम्ही अफगाणिस्तानातील अल कायदा नष्ट केला. आम्ही ओसामा बिन लादेनला शोधून मारले.
