जळगाव (प्रतिनिधी) पत्नीबरोबर सुखी आयुष्य चालू असताना डॉक्टरांनी पत्नीच्या मैत्रिणीबरोबर प्रेमाचे धागे जुळवले. तिच्याशी दुसऱ्या संसाराची स्वप्ने रंगविली, मात्र अशातच तिचे लग्न ठरले. काही दिवसांत साखरपुडा होणार त्याआधी डॉक्टरने बायकोच्या मैत्रिणीला पळवून श्रीरामपूरमध्ये निवासाची व्यवस्था केली. मुलगी गायब झाल्याने परिवार चिंतेत पडले होते. दरम्यान, लग्नाच्या तयारीत असतांना पोलिसांनी डॉक्टरचे बिंग फोडले. यामुळे एकच खळबळ उडाली आहे.
या घटने बाबत मिळालेली अधिक माहिती अशी की, पहूर ,ता. जामनेर , येथील दोन तरूणी एकमेकींच्या जीवलग मैत्रिणी होत्या. यातील एका तरूणीने शेंदुर्णी येथील डॉक्टर सोबत विवाह केला. याच विवाहात तिच्या मैत्रीणीची त्या डॉक्टर सोबत चांगलीच ओळख झाली. या संधीचा फायदा घेत पुढे डॉक्टरने तिच्या पत्नीच्या मैत्रीणीशी सुत जुळवले. अलीकडेच या तरूणीचा साखरपुडा झाला. यामुळे दोघांनी पळून जाऊन लग्नाचा निर्णय घेतला. तथापि, संशय येऊ नये म्हणून डॉक्टरने गोंदिया येथून एकाच व्यक्तीच्या नावावर दोन सीम घेतले. त्यावरून दोघांचे एकमेकांशी बोलणे होत होते. पोलिसांनी तांत्रिक माहितीचा वापर करून सीमा श्रीरामपूरला असल्याचे निष्पन्न केले.
डॉक्टरने २९ ऑक्टोबर रोजी या मुलीस पहूर येथून सोबत घेत पाचोर्याला नेले व तेथून एका कारमधून श्रीरामपूर येथील एका मित्राकडे तिला पाठवले. इकडे तिच्या कुटुंबीयांनी पहूर पोलिस ठाण्यात मुलगी हरवल्याची नोंद केली. या प्रकरणाची पोलिसांनी कसून चौकशी केली असता भलताच प्रकार समोर आला स्थानिक गुन्हे शाखेचे वरीष्ठ पोलिस निरीक्षक किरणकुमार बकाले, पहूर पोलिस ठाण्याचे सहाय्यक पोलिस निरीक्षक राकेशसिंग परदेशी, शशिकांत पाटील, श्रीराम धुमाळ, अनिल देवरे, ज्ञानेश्वर ठाकरे, स्थानिक गुन्हे शाखेचे विजय पाटील, नरेंद्र वारुळे, दिनेश बडगुजर यांच्या पथकाने या तरुणीस श्रीरामपूर येथून ताब्यात घेतल्यानंतर संबंधीत डॉक्टरने आखलेल्या प्लॅनचे बिंग फुटले. अर्थात, परंतु संबंधित तरुणीने स्वत:च्या इच्छेने श्रीरामपूर येथे गेल्याचा जबाब दिल्यामुळे डॉक्टरच्या विरूध्द या प्रकरणात गुन्हा दाखल केला जाऊ शकला नाही.
