पाचोरा (प्रतिनिधी) शहरातील छत्रपती शिवाजी महाराज चौकात ‘बागायतदार आहे, बागायतदारीण पाहिजे’ असे मोठमोठ्याने ओरडत घोषणा देत एक उच्चशिक्षित तरुणाने हातात फलक घेऊन कपाळी मुंडावळ ( बाशिंग) बांधून नवरदेवाच्या वेशात अनोखे आंदोलन करत पाचोराच नव्हे तर राज्यभरात चर्चा आहे. पंकज राजेंद्र महाले (३२), असे आंदोलन करणाऱ्या तरुणाचे नाव आहे.
पंकज नाचनखेडा गावातील एकटा दहा एकर बागायती शेतीचा मालक आहे. त्याचे बीएस्सी ॲग्रीचे उच्च शिक्षण पूर्ण झाले आहे. मात्र नोकरी नसल्याने त्याला लग्नासाठी मुलगी मिळत नाहीये. हा आपला एकट्याचा नव्हे तर, आपल्या सारख्या अनेक तरुणांची समस्या असल्याचे लक्षात आल्यानंतर या गंभीर विषयाकडे लक्ष वेधण्यासाठी पंकज महाले याने डोक्यावर टोपी, पांढरा गणवेश व कपाळी मुंडावळ्या असा नवरदेवाचा पेहराव करत शहरातील वर्दळीच्या मुख्य चौकात बागायतदार आहे, बागायतदारीण पाहिजे ! असा हातात फलक घेत, तो उंचावत ,घोषणाबाजी करून अनोखे आंदोलन केले. पंकजच्या आंदोलनच व्हिडीओ सोशल मीडियावर चांगलाच व्हायरल झाला असून त्यावर संमिश्र प्रतिक्रिया समोर येत आहे. दरम्यान, उच्चशिक्षित व बागायतदार शेतकरी तरुण पंकजच्या या आंदोलनाने समाजाला विचार करायला भाग पाडले आहे.
