चाळीसगाव (प्रतिनिधी) शहरातील धुळे रोडवरील विराम गार्डनसमोर दुचाकीवर आलेल्या दोघांनी महिलेच्या गळ्यातील ४५ हजारांची 15 ग्रॅमची सोन्याची मंगतपोत धूम स्टाईलने चोरून नेल्याची घटना ७ मे रोजी दुपारी ४.१५ वाजेच्या सुमारास घडली.
शिंदखेडा तालुक्यातील शेवाडे येथील मंगला गोकुळ सोनजे (वय ७०) या चाळीसगाव येथील धुळे रोडवरील फेस्टीओ रेसिडेंन्सी येथे ७ रोजी नातेवाईकाच्या लग्नाला आल्या होत्या. लग्न सोहळा आटोपल्यानंतर घरी जाण्यासाठी त्या नातेवाईकांसह धुळे रोडवरील हॉटेल विरामच्या बाहेर रस्त्यावर दुपारी ४.१५ वाजेच्या सुमारास एसटीची वाट पाहत होत्या. या वेळी त्यांना धुळ्याकडे जाणारी बस दिसल्याने त्या रस्त्याच्या कडेला आल्या. त्याचवेळी अचानक बस समोर काळ्या रंगाच्या दुचाकीवर दोन चोरटे आले व त्यांनी महिलेच्या गळ्यातील साडेतीन तोळ्याची सोन्याची मंगलपोत चोरण्याचा प्रयत्न केला. मात्र, त्यांनी मंगलपोत हातात घट्ट धरून ठेवल्याने मंगलपोतचा 15 ग्रॅम वजनाचे पेंडल व अर्धा भाग घेवून चोरटे दुचाकीवर पसार झाले. या प्रकरणी मंगला सोनजे यांच्या फिर्यादीवरुन चाळीसगाव ग्रामीण पोलीस ठाण्यात गुन्हा दाखल करण्यात आला आहे. ही माहिती मिळताच पो. नि. राहुलकुमार पवार व पोलीस पथकाने घटनास्थळी धाव घेत परिसरातील सीसीटीव्ही फुटेजची पाहणी केली. तपास हवालदार विजय शिंदे करत आहेत.
