जळगाव (प्रतिनिधी) अमृत योजनेत खोदण्यात आलेल्या खड्ड्यासमोर कोणत्याही प्रकारचे बॅरीकेडस अथवा सूचना नसल्याने तरुण दुचाकीसह यात पडल्याची घटना रात्री घडली आहे.
जळगाव मनसे चे जिल्हा सचिव यांचा मुलगा जुबेर देशपांडे (वय २४) हा काल रात्री १० वाजता घरी येत असताना आदर्श नगर येथील अमृत योजना पाईपलाईन मधील ६ फूट खोल खड्ड्यात गाडीसह पडला. कोणत्याही प्रकारची बॅरिकेट नसलेल्या या खड्ड्यात काही तासांमध्ये ३ लोकं पडली आहेत. असे जीवघेणे खड्डे व कामाचा निष्काळजी पणा लोकांचे जीव घेईल या बाबत आयुक्तांनी त्वरित लक्ष घालावे अशी मागणी ऍड जमील देशपांडे यांनी केली आहे. जुबेर देशपांडे याला किरकोळ स्वरूपाच्या जखमा झाल्या असून नशीब बलवत्तर म्हणून जीव वाचला असे जुबेर देशपांडे याने सांगितले आहे. संपूर्ण शहर खड्डेमय झाले असून अमृत योजना विष योजना झाली आहे. आपण याबाबत आयुक्त व महापौर यांची भेट घेणार असून कामाच्या बाबतीत जो निष्काळजी पणा सुरू आहे त्याची तक्रार करणार असल्याचे ऍड जमील देशपांडे यांनी म्हटले आहे.
