अमरावती (वृत्तसंस्था) विजेच्या कडकडाटासह जोरदार झालेल्या पावसामुळे वीज अंगावर पडून गुरुवारी (दि.21) दुपारी एका शेतकऱ्याचा मृत्यू झाला. सुधीर गुलाबराव बिडकर (34, रा. धनोडी) असे वीज पडून मृत्युमुखी पडलेल्या शेतकऱ्याचे नाव आहे.
धनोडी शेतशिवरात बिडकर यांचे सहा एकर शेत आहे. सुधीर हा शेतात शेतमजूरीचे काम करीत होता. यावेळी काही महिला मिरची तोडण्याचे काम करीत होत्या. तर काही मजूर फवारणीचे काम करीत होते. गुरुवारी दुपारी १२ वाजता पासून परिसरात विजेच्या कडकडाटासह पावसाला सुरुवात झाली, अशातच सुधीर याच्या अंगावर अचानक वीज कोसळल्याने त्याचा जागीच मृत्यु झाला. सुधीरचा मृतदेह शवविच्छेदनाकरिता ग्रामीण रुग्णालयात पाठविला आहे. सुधीर याच्या प्रश्चात आई, वडील, पत्नी, चार वर्षांचा आणि नऊ महिन्यांचा मुलगा आहे. या घटनेमुळे गावात हळहळ व्यक्त होत आहे. दरम्यान, या घटनेत आणखी एक महिला मजूर जखमी झाल्या. त्यांच्यावर उपचार सुरु असल्याचे कळते.
