शहादा (प्रतिनिधी) येथील वसंतराव नाईक कला, विज्ञान आणि वाणिज्य महाविद्यालयाच्या विद्यार्थी विकास विभागाकडून शहादे तालुक्यातील पिंगाणे गावात महिला आरोग्य संवर्धन ऋतुमती अभियान राबविण्यात आले. यात आजी-माजी राष्ट्रीय सेवा योजना स्वयंसेविकांनी पिंगाणे गावात एक सर्वेक्षण करून महिला आरोग्याशी संबंधित समस्या जाणून घेतल्या.
संबंधित महिला वर्गाशी पोहोचण्यासाठी त्यांनी एक प्रश्नावली तयार केली. यात प्रामुख्याने त्यांचे नाव, वय, वजन, उंची, विवाहित/अविवाहित, अपत्यांची संख्या, लग्न होऊन लोटलेला काळ, वार्षिक उत्पन्न, प्रथम मासिक धर्म येण्याचे वर्ष, यात नियमितता अनियमितता किती? वा सलग येणे, यादरम्यान होणारा त्रास, यासाठी दवाखान्यातून घेतलेले उपचार, मासिक धर्म बंद होण्याचे वर्ष, या नंतर उद्भवणार्‍या समस्या यासारखे प्रश्न विचारून त्यांच्या समस्यांचे शक्य तेवढे निराकरण करायचे प्रयत्न केले. सोबतच महिला वर्गाची संबंधित इतर माहितीही त्यांनी जाणून घेतली. पिंगाणे गावातून या अभियानाला फार चांगला प्रतिसाद मिळाला. हे अभियान कु. ईशा बोरसे, कु. वर्षा पाटील, कु. रेणुका कुवर, कु. आराधना माळी, कु. गीतांजली गिरासे, कु. गायत्री गिरासे या आजी-माजी राष्ट्रीय सेवा योजना स्वयंसेविकांनी महाविद्यालयाचे मा. प्राचार्य प्रो. डॉ. ए. एन. पाटील, विद्यार्थी विकास अधिकारी प्रा. डॉ. डी. वाय. पाटील, विद्यार्थी विकास सहाय्यक महिला अधिकारी प्रा. मालिनी अढाव यांच्या मार्गदर्शनात राबविले.
