नवी दिल्ली (वृत्तसंस्था) जगातील कोणतीही ताकद मला हाथरसला जाण्यापासून, त्या पीडित कुटुंबाला भेटण्यापासून रोखू शकत नाही, असे ट्वीट कॉंग्रेसचे नेते आणि माजी खासदार राहुल गांधी केले आहे. त्यामुळे उत्तर प्रदेश पोलीस आणि राहुल गांधी यांच्यात पुन्हा एकदा संघर्ष उफाळून येऊ शकतो.
राहुल गांधी आज पुन्हा हाथरसला जाणार असून त्याबाबत इशारा देताना म्हणाले की, जगातील कोणतीही ताकद मला हाथरसला जाण्यापासून, त्या पीडित कुटुंबाला भेटण्यापासून रोखू शकत नाही. पीडित मुलीच्या परिवाराशी यूपी पोलीस व यूपी सरकार ज्या प्रकारचे वर्तन करत आहे, ते मला मान्य नाही. कोणत्याही भारतीयाने ती स्वीकारु नये. राहुल गांधी आणि प्रियांका गांधी हे दोन दिवसांपूर्वी हाथरस प्रकरणातील पीडितेच्या कुटुंबियांना भेटण्यासाठी निघाले होते. परंतु दोघांनाही ग्रेटर नोएडा येथील परी चौकात रोखून पुन्हा दिल्लीला पाठवले. तिथे राहुल गांधी यांच्यासोबत धक्काबुक्की देखील झाली होती. दरम्यान, राहुल गांधी आज दुपारी हाथरसला रवाना होणार आहेत. त्यांच्यासोबत काँग्रेसचे काही खासदारदेखील असतील. राहुल गांधींच्या नेतृत्वात काँग्रेसचे प्रतिनिधी मंडळ पीडितेच्या कुटुंबियांचे सांत्वन करेल. या सरकारने पीडितेच्या कुटुंबाला न्यायापासून वंचित ठेवलं आहे, असा आरोप काँग्रेसने केला आहे.
