बोदवड (प्रतिनिधी) तालुक्यातील मौजे चिंचखेड प्र.बो. -धोंडखेडा शिवरस्त्यावरील सुमारे २०० ते २५० मीटर लांबीच्या भाग काही लोकांनी बेकायदेशीर बळकावून त्यावर पीक पेरणी केली आहे. याविरोधात बोदवड तहसील कार्यालया समोर सुरु असलेले उपोषण मागे घेण्यात आले आहे. यावेळी खासदार रक्षाताई खडसे व आमदार चंद्रकांत पाटील यांचे प्रशासनास कारवाईसंबंधी सूचना केल्या.
तालुक्यातील मौजे चिंचखेड प्र.बो. -धोंडखेडा शिवरस्त्यावरील सुमारे २०० ते २५० मीटर लांबीच्या भाग काही लोकांनी बेकायदेशीर बळकावून त्यावर पीक पेरणी केली आहे. त्यामुळे सार्वजनिक रस्ता बंद झाला आहे. या लोकांवर गुन्हे दाखल करून रस्ता मोकळा करून घ्यावा, अशी मागणी शेवगे खुर्द येथील सोपं नामदेव ताठे यांनी केली होती. पण कारवाई न झाल्याने त्यांनी सोमवार सकाळ पासून तहसील कार्यालयासमोर उपोषणास प्रारंभ केला होता. या विषयी दुपारी पाचच्या सुमारास प्रशासकीय कामाचे निमित्ताने आलेल्या खासदार रक्षाताई खडसे यांनी उपोषणकर्ते ताठे यांची भेट घेतली व तहसीलदार श्वेता संचेती यांना या प्रकरणी योग्य ती कारवाई करण्याच्या सूचना दिल्या. त्यानुसार तहसीलदारांनी या प्रकरणी नियमानुसार कारवाईस तात्काळ सुरवात करण्यात येईल, असे पत्र उपोषणकर्ते यांना देण्यासाठी उपोषणस्थळी आल्या.
यावेळी बोदवड नगराध्यक्ष आंनदा पाटील यांनी भ्रमणध्वनीवरून उपोषणकर्ते यांचे बोलणे आमदार चंद्रकांत पाटील यांच्याशी करून दिले. आमदार पाटील यांनी सुद्धा तहसीलदार यांना योग्य त्या कारवाई संबधी सूचना केल्यात. यानंतर उपोषणकर्ते ताठे यांनी तहसीलदार संचेती यांच्याकडून पत्र स्वीकारले व उपोषण मागे घेतले. यावेळी नगरसेवक सईद बागवान, गोलू बरडीया, हर्षल बडगुजर, पप्पू चव्हाण, सुभाष देवकर हे कार्यकर्ते उपस्थित होते.
