जळगाव (प्रतिनिधी) शहरातील मेहरूण तलावाजवळ मैत्रिणीसोबत फिरताना अज्ञात चोरट्यांनी धारदार शस्त्राचा धाक दाखवून मोबाईल हिसकावून नेल्याप्रकरणी तिघांविरोधात विरोधात गुन्हा दाखल करण्यात आला आहे. याप्रकरणी एमआयडीसी पोलिसांनी राहुल राजू गवळी (वय-२०, रा. तंबापुरा) या संशयिताला अटक केली असून शकील शहा रुबाब शहा (रा.तांबापुरा) व कलिमुद्दिन शेख उर्फ माकोडा (पूर्ण नाव माहित नाही) या दोघांचा शोध घेत आहेत.
यासंदर्भात अधिक असे की इंद्रजीत हेमंत देशमुख (वय-२५,रा.उत्कर्ष सोसायटी,आदर्श नगर) हा तरुण आपल्या मैत्रिणीसोबत १६ नोव्हेंबर रोजी सायंकाळी सात वाजेच्या सुमारास मेहरूण परिसरात फिरण्यासाठी गेला होता. त्यावेळी मेहरुन तलाव जवळील नवीन बिल्डिंगच्या बांधकाम जवळ अचानकपणे तीन जण मोटरसायकलने आले व त्यातील एकाने इंद्रजीतकडे दारू पिण्यासाठी पैसे मागायला सुरुवात केली. इंद्रजीतने पैसे नाहीत असे सांगतात, त्यातील एकाने इंद्रजीतला मारहाण करण्यास सुरुवात केली. तर दुसऱ्या आरोपीने त्याच्यासोबत असलेल्या मैत्रिणी सोबत झटापट करून हातातील मोबाईल बळजबरीने हिसकावून घेतला. तिसरा आरोपी हातात धारदार चॉपर सारखे हत्यार होते. त्याच्याच धाक दाखवून त्याने लूटपाट करायला सुरुवात केली. ‘तुम्हारे पास के पैसे और गहने निकालो’ असे बोलून इंद्रजीतच्या खिशातील मोबाईल हिसकावण्याचा प्रयत्न करत असताना दोघांमध्ये झटापट झाली. या झटापटीत इंद्रजीतच्या पोटाच्या डाव्या बाजूला चॉपर लागून जखम झाली आहे. यासंदर्भात एमआयडीसी पोलीस स्थानकात गुन्हा दाखल करण्यात आल्यानंतर पोलिसांनी तपास चक्र फिरवायला सुरुवात केली. त्यानंतर या गुन्ह्यातील राहुल राजू गवळी याला अटक करण्यात आली. त्याला आज न्यायालयात हजर करण्यात येणार आहे.
