मुक्ताईनगर (प्रतिनिधी) माझ्यासोबत १५ ते १६ माजी आमदार असून ते माझ्यासोबत उद्या मुंबईत येणार आहेत. एवढेच नव्हे तर काही विद्यमान आमदारही माझ्यासोबत आहेत, पण पक्षांतर बंदी कायद्यामुळे त्यांना पक्ष सोडण्यास अडचण असल्याचा खळबळजनक दावा एकनाथराव खडसे यांनी केला आहे. ते मुंबईला रवाना होण्यापूर्वी पत्रकारांशी बोलत होते.
एकनाथराव खडसे यांनी मुंबईला रवाना होण्यापूर्वी मुक्ताईनगरातील त्यांच्या फार्महाऊसवर काही वृत्तवाहिन्यांसह पत्रकारांशी संवाद साधला. यावेळी त्यांनी माझ्यासोबत १५ ते १६ माजी आमदार आहेत. ते उद्या मुंबईत येणार आहेत. काही विद्यमान आमदारही माझ्यासोबत आहेत, पण पक्षांतर बंदी कायद्यामुळे त्यांना पक्ष सोडण्यास अडचण आहे. एवढ्या आमदारांनी राजीनामे दिले तर निवडणूक घेणे शक्य नाही, असेही खडसे म्हणाले. तसेच फडणविसांनी माझी बाजू वरिष्ठांजवळ चुकीची मांडली. मी एकच बाजू मांडल्याचे फडणवीस आता म्हणत आहेत. पण मग गेली साडेचार वर्षे ते कुठे गेले होते. मी सातत्याने न्यायाची मागणी करत असताना, माझा गुन्हा काय, ते विचारत असताना त्यांनी चालढकल का केली? असा सवाल देखील खडसे यांनी फडणवीसांना केला. मला न्याय मिळत नसल्यानेच मी माझ्या समर्थकांशी चर्चा करून अखेर पक्षांतर करण्याचा हा निर्णय घेतल्याचेही ते म्हणाले.
