मुंबई (वृत्तसंस्था) राज्यसभेच्या सहाव्या जागेसाठी शिवसेनेकडून संभाजीराजे छत्रपती हे उमेदवार असण्याची शक्यता आहे. राजे, उद्या दुपारी १२ वाजता शिवबंधन बांधण्यासाठी मातोश्रीवर या, असा निरोप त्यांनी संजय राऊतांकरवी संभाजीराजेंना दिला आहे. याच वेळी संभाजीराजे शिवसेनेत प्रवेश करण्याची शक्यताही आहे.
शिवसेनेचं शिष्टमंडळ संभाजीराजेंच्या भेटीला हॉटेल ट्रायडंट येथे गेलं होतं. खासदार अनिल देसाई, उदय सामंत, मिलिंद नार्वेकर हे संभाजीराजेंच्या भेटीला गेले होते. राज्यसभेच्या सहाव्या जागेसंदर्भात चर्चा करण्यासाठी हे शिष्टमंडळ संभाजीराजेंच्या भेटीला गेले होते. त्यानंतर काहीच वेळात उद्धव ठाकरे यांनी संभाजीराजेंना शिवबंधन बांधण्यासाठी निरोप पाठवला आहे. “उद्या दुपारी १२ वाजता शिवबंधन बांधण्यासाठी वर्षा बंगल्यावर या”, असा निरोप उद्धव ठाकरेंनी संभाजीराजेंना दिला आहे. तर संजय राऊतांनी संभाजीराजेंना फोन केल्याची माहिती आहे. राज्यसभेच्या सहा जागांसाठी 10 जूनला निवडणूक होणार आहे. संभाजीराजे छत्रपती यांनी शिवसेनेची उमेदवारी स्विकारुन निवडणूक लढवावी, असं शिवसेना खासदार संजय राऊत यांनी म्हटलं होतं. दरम्यान, गेल्या काही दिवसांपासून शिवसेना संभाजीराजे छत्रपतींना राज्यसभेसाठी उमेदवारी देणार असल्याच्या चर्चांना उधाण आलं होतं. यातच आता संभाजीराजे छत्रपती शिवसेना पुरुस्कृत उमेदवार असतील अशी माहिती समोर आली आहे.
