बसमध्ये चढतांना सेवानिवृत्त कर्मचाऱ्याच्या खिशातून २० हजारांची रोकड चोरी !
जळगाव (प्रतिनिधी) बसमध्ये चढतांना महापालिकेचे सेवानिवृत्त कर्मचारी अनिल चेंगट यांच्या पॅन्टच्या चोर खिशातून २० हजार रुपये लंबविल्याची घटना नवीन बस स्थानकात घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
सविस्तर वृत्त असे की, शहरातील शनीपेठ परिसरातील कांचन नगरात अनिल हजारी चेंगट (वय ६४,) हे सेवानिवृत्त मनपा कर्मचारी वास्तव्यास आहे. दि. २८ रोजी त्यांनी मनपाच्या बँकेतून २३ हजार रुपये काढले होते. त्यानंतर दि. ३१ जानेवारी रोजी ते मुलगा व जावाईसोबत धुळे येथे महिला दक्षता समिती येथे जाण्यासाठी नवीन बसस्थानकात आले. याठिकाणी भुसावळ ते नाशिक बस आल्याने ते तिघे बसमध्ये बसण्यासाठी गेले. यावेळी बसमध्ये प्रचंड गर्दी होती, याच गर्दीचा फायदा घेत चोरट्यांनी बेंगट यांच्या पॅन्टच्या चोर खिशातून २० हजार रुपयांची रोकड लंपास केली. बसमध्ये चढल्यानंतर बेंगट यांना आपल्या खिशातून पैसे चोरी झाल्याचे लक्षात आले.
पोलिसांनी केली बस स्थानकात चौकशी
पैसे चोरी झाल्याचे लक्षात येताच, बेंगट हे मुलगा व जावाईसोबत बसमधून खाली उतरून त्यांनी जिल्हापेठ पोलिसात धाव घेतली. यावेळी पोलीस त्यांच्यासोबत बस स्थानकात आले. त्यांनी बस स्थानकात चौकशी केली, मात्र चेंगट यांना धुळे जाणे गरजेचे असल्याने ते तक्रार न देता धुळे निघून गेले.
अज्ञात चोरट्याविरुद्ध गुन्हा
धुळे येथील काम आटोपून अनिल चेंगट यांनी शनिवार जिल्हापेठ पोलीस ठाण्यात तक्रार दिली. त्यानुसार अज्ञात चोरट्यांविरुद्ध गुन्हा दाखल करण्यात आला आहे.
