जळगाव प्रतिनिधी । बसमध्ये चढत असताना एका सेवानिवृत्त सैनिकाच्या खिशातून ३९ हजारांची रोकड अज्ञात चोरट्यांनी चोरून नेल्याची घटना घडली आहे. ही घटना जळगावातील नवीन बसस्थानक आवारात सोमवारी दुपारी २ वाजता घडली आहे. याप्रकरणी सायंकाळी ६ वाजता जिल्हापेठ पोलीस ठाण्यात अज्ञात चोरट्यांवर गुन्हा दाखल करण्यात आला.
या संदर्भात मिळालेली माहिती अशी की, किशोर माणिक पाटील वय-४४, रा.रामकृष्ण नगर, धरणगाव हे आपल्या कुटुंबासह वास्तव्याला आहे. ते सीआरपीएफ सेवेतून सेवानिवृत्त झालेले आहे. दरम्यान सोमवारी २९ जुलै रोजी दुपारी ते जळगाव शहरात आलेले होते. काम आटोपून ते दुपारी २ वाजता अकोला- नाशिक बसमध्ये चढत असताना अज्ञात चोरट्याने त्यांच्या खिशातून ३८ हजार ९०० रुपयांची रोकड चोरून नेली. ही बाब लक्षात आल्यानंतर त्यांनी सर्वत्र शोध घेतला, परंतु कोणतीही माहिती मिळाली नाही. अखेर त्यांनी सायंकाळी ६ वाजता जिल्हापेठ पोलिसात धाव घेऊन तक्रार दिली. त्यानुसार अज्ञात चोरट्यांवर गुन्हा दाखल करण्यात आला आहे. याचा पुढील तपास जिल्हापेठ पोलीस कर्मचारी करीत आहे.
