जळगाव शहाबाज देशपांडे : जिल्हा वार्षिक योजना (DPDC) अंतर्गत निधीचे प्रभावी नियोजन आणि काटेकोर अंमलबजावणीमुळे जळगाव जिल्ह्याने राज्यात सलग चौथ्यांदा अव्वल स्थान पटकावले आहे. सन २०२५-२६ या आर्थिक वर्षात जिल्हा नियोजन समिती अंतर्गत सर्वसाधारण, आदिवासी घटक (TSP/OTSP) व अनुसूचित जाती (SCP) योजनेतील एकूण ८३४ कोटी ६१ लाख ८९ हजार रुपयांचा निधी १०० टक्के खर्च करण्यात प्रशासनाला यश आले आहे.
या उल्लेखनीय कामगिरीबद्दल पालकमंत्री गुलाबराव पाटील यांनी जिल्हाधिकारी रोहन घुगे यांचा विशेष गौरव केला. तसेच जिल्हा परिषद मुख्य कार्यकारी अधिकारी मिनल करनवाल, पोलीस अधीक्षक डॉ. महेश्वर रेड्डी, महानगरपालिका आयुक्त ज्ञानेश्वर ढेरे, जिल्हा नियोजन अधिकारी भरत साळुंखे, जिल्हा समाजकल्याण अधिकारी योगेश पाटील, यावल प्रकल्प संचालक अरुण पवार तसेच विविध विभागांच्या प्रमुख अधिकाऱ्यांचाही सन्मान करण्यात आला.
