जळगाव (प्रतिनिधी) – शहरात अंमली पदार्थांच्या अवैध विक्री आणि वाहतुकीविरोधात जळगाव स्थानिक गुन्हे शाखा आणि जिल्हापेठ पोलिसांनी संयुक्तरीत्या धडक कारवाई केली आहे. या कारवाईत ५६.२९ ग्रॅम मेफेड्रोन (एम.डी.) हा अंमली पदार्थ जप्त करण्यात आला असून, दोन संशयित आरोपींना जेरबंद करण्यात पोलिसांना यश आले आहे.
या कारवाईत एकूण ३ लाख ६ हजार ५४० रुपयांचा मुद्देमाल जप्त करण्यात आला आहे. जिल्हा पोलीस अधीक्षक श्रीकांत धिवरे यांनी दिलेल्या ‘नशामुक्त भारत’ अभियानाच्या अनुषंगाने, स्थानिक गुन्हे शाखेचे वरिष्ठ पोलीस निरीक्षक श राहुल गायकवाड यांना गोपनीय माहिती मिळाली होती. शुक्रवार, १० जुलै रोजी पहाटे २:३५ च्या सुमारास छत्रपती शिवाजी महाराज पुतळ्याजवळील शासकीय तांत्रिक विद्यालयाशेजारील जी.एस. ग्राऊंडच्या प्रवेशद्वाराजवळ काही इसम एम.डी.ची तस्करी करत
असल्याची माहिती मिळताच विशेष पथकाने सापळा रचला. पोलिसांची चाहूल लागताच एका आरोपीने अंधाराचा फायदा घेत पोबारा केला, तर दोघांना पोलिसांनी ताब्यात घेतले.
३ लाखांचा मुद्देमाल जप्त तपासणीदरम्यान आरोपींकडे ५६.२९ ग्रॅम वजनाची पांढऱ्या रंगाची पावडर मिळून आली, जी ‘मेफेड्रोन’ असल्याचे फॉरेन्सिक तपासणीत निष्पन्न झाले. पोलिसांनी खालील मुद्देमाल जप्त केला आहे. २ लाख ८१ हजार रुपये किमतीचे ५६.२९ ग्रॅम. मेफेड्रोन, २५ हजार रुपये किमतीची मोटर सायकल असा एकूण ३ लाख ६ हजार रुपये किमतीचा मुद्देमाल पोलिसांनी जप्त केला आहे. तसेच याप्रकरणी जयेश देविदास तायडे (वय २७, रा. हरी ओम नगर) आणि जितेंद्र शिवाजी परदेशी (वय ३१, रा. कांचन नगर) यांना अटक करण्यात आली आहे. प्राथमिक चौकशीत या अंमली पदार्थांचा पुरवठा भैय्या सोनवणे याने केल्याची कबुली आरोपींनी दिली असून, फरार आरोपीचा शोध पोलीस घेत आहेत.
या पथकाची कारवाई
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उप-विभागीय पोलीस अधिकारी नितीन गणापुरे यांच्या मार्गदर्शनाखाली स्थानिक गुन्हे शाखेचे पोलीस निरीक्षक राहुल गायकवाड, सपोनि अनिल वाघ, उपनिरीक्षक संतोष पवार, दीपक जगदाळे, जितेंद्र वाल्टे, सफौ. अतुल वंजारी, हेमराज भावसार, अकरम शेख, मुरलीधर धनगर, प्रवीण भालेराव, महेश महाजन, विजय पाटील, किशोर पाटील, छगन तायडे, प्रदीप सपकाळे, राहुल रगडे, उदय कापडणे यांच्या पथकाने केली.
