जळगाव (प्रतिनिधी) माजी महापौर ललित कोल्हे यांच्या फार्म हाऊसमध्ये सुरु असलेल्या बोगस कॉल सेंटरमधून ६७तर कोल्हे यांच्या मोबाईलवरुन १८ आंतराष्ट्रीय कॉल झाल्याचे पोलिसांच्या तपासात समोर आहे. तसेच अटकेतील राकेश अगारिया व आरती कोळी नामक महिलेच्या बँक खात्याला कोल्हे यांचा मोबाईल क्रमांक लिंक असल्याची माहिती तपासधिकाऱ्यांनी न्यायालयात दिली. त्यानुसार या गुन्ह्याचा तपासाकरीता कोल्हे यांना दि. ८ पर्यंत वाढीव पोलीस कोठडी सुनावल्यामुळे कोल्हेंचा कोठडीतील मुक्काम वाढला आहे.
नामांकीत कंपन्यांचे प्रतिनिधी असल्याचे सांगण्यासह वेगवेगळे अमिष दाखवून इंग्लंडसह अन्य देशांमधील नागरिकांची आर्थिक फसवणूक करणाऱ्या एल. के फार्म हाऊसवरील बोगस कॉलसेंटवर पोलिसांनी छापा टाकला होता. याप्रकरणी माजी महापौर ललित कोल्हे यांच्यासह सात जणांना अटक केले होती. त्यांच्या पोलीस कोठडीची मुदत संपल्यामुळे कोल्हे यांच्यासह इतर संशयितांना हातात बेड्या घालून शनिवारी न्यायालयात हजर करण्यात आले.
यावेळी तपासाधिकारी डीवायएसपी नितीन गणापुरे यांनी संशयितांनी फसवणुकीची पद्धत आणि तपासात उघड झालेल्या बाबी न्यायालयाच्या निदर्शनास आणून दिल्या. त्यानुसार अटकेतील संशयित ललित कोल्हे (रा. कोल्हे नगर) यांच्यासह राकेश चंदू अगारिया (रा. वाघ नगर) या दोघांची चौकशी करण्यासाठी त्यांनी वाढीव पोलीस कोठडीची मागणी तपासधिकारी गणापुरे यांनी युक्तीवादातून केली. त्यावर बचाव पक्षांच्या वकिलांनी तीव्र विरोध करीत वाढीव कोठडीच्या कारणांवर आक्षेप घेतला. मात्र तपासाधिकाऱ्यांनी या गुन्ह्याचे गांभीर्य पुन्हा न्यायालयासमोर मांडला.
पाच जणांना न्यायालयीन कोठडी
दोन्ही पक्षांचा युक्तीवाद ऐकून घेतल्यानंतर न्या. एस.डी. खरे यांनी ललित कोल्हे व राकेश अगारिया यांना दि. 8 ऑक्टोबरपर्यंत वाढीव पोलिस कोठडी सुनावली. तसेच नरेंद्र चंदू अगारीया, मोहम्मद जिशान नुरी मोहम्मद नुर आलम (वय १९), शाहबाज आलम मोहम्मद शाहबउद्दीन (वय २५), साकीब आलम शहाबरहीन (वय १९) मोहम्मद हाशिर मोहम्मद राशिद (वय १९, सर्व रा. हावडा, पश्चिम बंगाल) यांना न्यायालयीन कोठडी सुनावण्यात आली.
विदेशातील सहभागी असलेल्यांचा घेणार शोध
जप्त केलेल्या लॅपटॉपमधून अटकेतील संशयित इम्रान खान याने बोगस कॉल सेंटरसाठी लागणारे इंटरनेट स्वतःच्या नावाने घेतले असून त्याची केवायसी त्याच्याच नावावर आहे. तसेच लॅपटॉपमध्ये पेपल व अॅमेझॉन कस्टमर सपोर्ट या कंपन्यांचा डेटा मिळून आला आहे. त्याचप्रमाणे विदेशी नागरिकांचे मोबाईल क्रमांक, ई-मेल आयडी, बँक खात्याची माहितीसह इतर बरीच माहिती आणि विदेशी नागरिकांना फसविण्यासाठी वापरली जाणारी स्क्रिप्ट मिळून आली आहे. कॉल सेंटर चालविण्यासाठी परदेशात कुणी सहभागी आहे का याची देखील चौकशी केली जाणार आहे.
इतर साक्षीदारांचे नोंदवले जबाब
बोगस कॉल सेंटरवर इंटरनेट कनेक्शन लावणारा, पेंटर काम, फर्निचर वाला यासह या गुन्ह्यातील संशयित राकेश अगारिया व आरती रमेश कोळी या महिलेच्या बँक खात्यासोबत संशयित माजी महापौर कोल्हे हे वापरत असलेले दोघ मोबाईल क्रमांक लिंक असल्याचे पोलिसांच्या तपासात उघड झाले आहे. तसेच यांचयासह इतर साक्षीदारांचे देखील जबाब नोंदविण्यात आले आहे.
डेटा मिळवला कोठून ?
फसवणुकीसाठी माजी महापौर ललित कोल्हे व त्यांच्या साथीदारांनी ग्राहकांचा डेटा कोठून मिळवला. त्याचा देखील पोलिसांकडून तपास केला जात आहे. तसेच राकेश व नरेंद्र अगारिया दोघ भावांनी कॉल सेंटरमध्ये काम करणाऱ्यांना कोणत्या माध्यमासह कोणत्या जाहीरातीवरुन नोकरीवर ठेवले याबाबत देखील चौकशी केली जाणार आहे.
बँक खात्यांची होणार चौकशी
फसवणुकीतून मिळालेली रक्कम कशी मिळवली. तसेच हा गुन्हा क्लिष्ट आणि गुंतागुंतीचा असून त्याची संपुर्ण माहिती राकेश अगारिया व ललित कोल्हे यांना माहिती आहे. तसेच आरती कोळी व राकेश अगारिया यांच्या बँक खात्याशी कोल्हेंचे दोघ मोबाईल क्रमांक लिंक आहे. त्यातून किती अवैध पैशांचे व्यवहार झाले असून किती रक्कम प्राप्त झाली आहे. तसेच बोगस कॉल सेंटर च्या माध्यमातुन प्राप्त होणारी रक्कम ही त्यांनी बनावट बँक खात्यात घेतली का याची देखील तपासणी केली जाणार आहे.
स्क्रिप्टनुसार तीन टप्प्यात सुरु होते गंडवण्याचे काम
विदेशी नागरिकांना गंडविण्याासाठी लॅपटॉपमधून दोन स्क्रिप्ट मिळून आल्या असून त्या संशयित आदिल सैय्यद व अकबर यांनी तयार केल्याचे तपासात उघड झाले आहे. या स्क्रिप्टचे तीन टप्पे तयार करुन त्यावर कोण काम करीत होते. याची चौकशी केली जाणार आहे. विदेशी नागरिकांचे मिळालेल्या माहितीनुसार कोणाची किती फसवणूक झाली याबाबत चौकशी करुन ती रक्कम हस्तगत करणे बाकी आहे. अटकेतील दोघांनी सांगितलेल्या माहितीनुसार तपासपथक मुबईला रवाना झाले. परंतु ते दोघ पोलिसांची दिशाभूल करीत असून त्यांना प्रत्यक्ष मुंबईत नेवून फरार संशयितांचा शोध घेतला जाणार आहे.
