धरणगाव (प्रतिनिधी) शहरातील एकाची ८३ हजारांची ऑनलाईन फसवणूक झाल्याचा प्रकार उघडकीस आला आहे. याप्रकरणी धरणगाव पोलिसात अज्ञात व्यक्तीविरुद्ध गुन्हा दाखल करण्यात आला आहे.
या संदर्भात अधिक असे की, नितीन श्रावण पाटील (वय ४५) हे शहरातील भावे गल्लीत आपल्या परिवारासह वास्तव्यास आहेत. दि.१६ मार्च रोजी कोणीतरी अज्ञात इसमाने DTDC कंपनीचा म्हणून कस्टमर केअरचा फोन क्रमांक ८६५३६२८७७१ वरुन नितीन पाटील यांच्या मोबाईलवर फोन केला. त्यानंतर संबधीत व्यक्तीने कुरीयरचे डिटेल्स विचारले आणि नितीन पाटील यांच्या मोबाईलवर एक base APK नावाची PDF फाईलची लींक टाकत त्या लिंकद्वारे रजीस्ट्रेशन करायला सांगितले.
नितीन पाटील यांनी त्या लिंकवर जात माहीती भरुन समोरील भामट्याने सांगीतल्याप्रमाणे ऑनलाईन ५ रुपये फी सदर लीकव्दारे पाठविले. नंतर दुसऱ्या दिवशी आपल्या बँक खात्यातून कोणीतरी अज्ञात इसमाने एकूण ५ ऑनलाईन ट्रान्झेक्शनद्वारे तब्बल ८३ हजार काढून घेतल्याचे श्री. पाटील यांच्या लक्षात आले. त्यामुळे त्यांनी तात्काळ पोलीस स्टेशन गाठत तक्रार नोंदवली. याप्रकरणी अज्ञात व्यक्तीविरुद्ध फसवणुकीचा गुन्हा दाखल करण्यात आला असून पुढील तपास पोलीस निरीक्षक उध्दव डमाळे हे करीत आहेत.
