मुंबई (वृत्तसंस्था) महायुतीतील घटक पक्ष असलेल्या माजी मंत्री महादेव जानकर यांच्या राष्ट्रीय समाज पक्षाने (रासप) विधानसभा निवडणुका स्वबळावर लढण्याचा निर्णय घेतला आहे. आमची कोणावरही नाराजी नाही. मात्र महायुतीत अपेक्षित जागा मिळणार नसल्याने राज्यातील सर्व २८८ मतदारसंघांत रासपचे उमेदवार देणार असल्याचे जानकर यांनी स्पष्ट केले आहे. पुण्यातील दौंडमध्ये जानकर लवकरच मेळावा घेणार असून, तेथून प्रचाराला सुरुवात करणार आहेत.
माजी मंत्री महादेव जानकर यांना भाजपचे दिवंगत नेते गोपीनाथ मुंडे यांनी राजकारणात मोठी संधी दिली. २०१४ साली जानकर यांना महायुतीत घेऊन बारामतीतून लोकसभा उमेदवारी दिली. बारामती लोकसभा मतदारसंघात जानकर यांनी खासदार सुप्रिया सुळे यांना तगडी लढत दिली. तीन ते साडेतीन लाखांनी विजयी होणाऱ्या सुळेंचे मताधिक्य ६९ हजारांपर्यंत खाली आणले. लोकसभेला पराभूत झाल्यानंतर भाजपने जानकर यांना राज्यात कॅबिनेट मंत्रीपद दिले. मात्र २०१९ मध्ये जागावाटपात भाजपने आपली फसवणूक केल्याचे सांगत जानकर यांनी भाजपपासून दूर राहण्यास सुरुवात केली.
गेली ५ वर्षे जानकर व त्यांचा पक्ष केवळ नावालाच महायुतीसोबत होता. २०२४ लोकसभा निवडणुकीत जानकर यांनी शरद पवार यांच्यासोबत जाण्यासाठी बोलणी सुरू केली. परंतु भाजपने त्यांना परभणीची लोकसभेची उमेदवारी दिली. त्यामुळे महाविकास आघाडी जाता जाता राहिले. परभणीत पराभव झाल्यानंतर भाजपने त्यांना राज्यसभेचे आश्वासन दिल्याची चर्चा होती. मात्र आता जानकर यांनी पुन्हा एकदा स्वबळाचा नारा दिला आहे. अर्थात जानकर यांनी नेहमीचा आक्रमकपणा दाखवला नाही. त्यामुळे जानकर यांचा स्वबळाचा नारा पक्षाच्या हिताच्या आहे की महायुतीच्या, याची चर्चा राजकीय वर्तुळात रंगू लागली आहे.