वरणगाव (प्रतिनिधी) आजीकडे शिक्षणासाठी आलेल्या एका १२ वर्षीय विद्यार्थ्याचा डेंग्यू सदृष्य आजाराने मृत्यू झाल्याची घटना उघडकीस आल्यानंतर नागरिकांमध्ये भितीचे वातावरण पसरले आहे. अणर्व विशाल कुळकर्णी (मूळ रा. अंतुर्ली), असे मयत विद्यार्थ्याचे नाव आहे.
शहरातील जुने पोस्ट गल्लीतील आपल्या आजीकडे शिक्षणासाठी आलेला अणर्व विशाल कुळकर्णी आहे. या विद्यार्थ्याला डेंग्यु सदृष्य आजाराची लागण झाल्याने त्याच्या शरीरातील प्लेट्स लेट्स कमी झाल्या होत्या. त्यामुळे काल अचानक त्याची प्रकृती खालावल्याने त्याला तातडीने भुसावळातील खासगी रुग्णालयात उपचारासाठी दाखल करण्यात आले. याठिकाणी त्याच्यावर उपचार सुरु असतानांच त्याची प्राणज्योत मालवली. या घटनेमुळे गावात शोककळा पसरली असून मयत विद्यार्थ्यावर अंतुर्ली येथे शोकाकुल वातावरणात अंतिमसंस्कार करण्यात आले. दरम्यान, शहरात गेल्या काही दिवसांपासून डेंग्यु सदृष्य आजाराची रुग्ण संख्या वाढत असल्यामुळे तातडीने उपाय योजनांची अंमलबजावणी करण्याची गरज आहे.
