छत्रपती संभाजीनगर (वृत्तसंस्था) चेक बाऊन्स प्रकरणात न्यायालयाने काढलेले समन्स बजावण्यासाठी दीड हजाराची लाच मागणाऱ्या एमआयडीसी वाळूज ठाण्यातील पोलिसाला अटक करण्यात आली. लाचलुचपत प्रतिबंधक विभागाच्या (एसीबी) पथकाने दि. २७ ही कारवाई केली. संतोष गिरजाराम वाघ (४४) असे अटकेतील पोलिस अंमलदाराचे नाव आहे.
तक्रारदार व्यक्तीला एकाने दोन धनादेश दिले होते. ते बँकेत वटले नाहीत. त्यांनी धनादेश अनादरप्रकरणी न्यायालयात कलम १३८ नुसार दावा दाखल केला. या प्रकरणात न्यायालयाने प्रतिवादीला समन्स काढले आहे. समन्स तामिल करण्याची जबाबदारी एमआयडीसी वाळूज ठाण्यातील पोलिस अंमलदार संतोष वाघवर होती. त्याने हे दावा दाखल करणाऱ्यालाच २ हजार रुपये लाचेची मागणी केली. त्यांनी ५०० रुपये वाघला दिले, दरम्यान, २७ ऑगस्टला वाघ यांनी उर्वरित दीड हजार रुपये लाचेची मागणी केली. त्याआधारे एसीबीचे पोलिस निरीक्षक संतोष घोडके यांनी सापळा लावला. मात्र, संशय आल्याने वाघने लाचेची रक्कम स्वीकारली नाही. त्यानंतर एसीबी पथकाने वाघ यांना एमआयडीसी वाळूज ठाण्यात गुन्हा नोंदविला. ही कारवाई अंमलदार रवींद्र काळे, विलास चव्हाण, चांगदेव बागुल यांनी केली.
