पुणे (वृत्तसंस्था) कुख्यात गुंड गजानन मारणेचा (Gajanan Marne) मुलगा प्रथमेश मारणे याच्यावर पुण्यात (Pune) बलात्काराचा गुन्हा दाखल करण्यात आला आहे. प्रथमेशवर सिंहगड रोड पोलीस स्थानकात गुन्हा दाखल करण्यात आला आहे. प्रथमेश मारणे आणि पीडित तरुणी गेल्या अडीच वर्षांपासून एकमेकांना ओळखत होते. यादरम्यान आरोपीने तरुणीला २७ ऑगस्ट २०२० ते १७ मार्च २०२२ दरम्यान वेगवेगळ्या लॉजवर नेऊन लैंगिक अत्याचार केले.
ही तरुणी एका महाविद्यालयात शिकत आहे. तिची आणि प्रथमेश मारणे यांची ओळख होती. मारणे याने तिला खडकवासला येथे फिरायला नेले. घरी परत येताना एका लॉजवर थांबून त्याने तिच्याबरोबर जबरदस्तीने शारीरिक संबंध प्रस्थापित केले. त्यानंतर वेगवेगळ्या लॉजवर नेऊन प्रथमेश याने तिच्या नकळत तिचे परस्पर अश्लील व्हिडिओ बनवले. हे समजल्यावर तिने त्याला ते डिलीट करायची विनंती केली. पोलिसांमध्ये तक्रार देईन, असे सांगितले. तेव्हा त्याने पोलिसांमध्ये तक्रार दिल्यास ते व्हिडिओ सोशल मीडियावर व्हायरल करण्याची धमकी दिली. शेवटी तिने धीर धरून पोलिसांकडे तक्रार दिली. जयश्री मारणे यांनी राष्ट्रवादीत प्रवेश केल्यांनतर प्रथमेश मारणेने या पक्षात प्रवेश केला होता.
तब्बल ८ वर्षानंतर गजानन मारणेची तुरुंगातून सुटका
तळोजा कारागृहातून सुटल्यानंतर मुंबई पुणे एक्सप्रेस वेवर रॅली काढल्याप्रकरणी पुणे ग्रामीण पोलिसांनी अटक करुन गुंड गजानन मारणे याच्यावर एम पी डी ए कायद्यान्वये १ वर्ष स्थानबद्ध केले होते. ही एक वर्षाची मुदत संपल्यानंतर नागपूर कारागृहातून मागच्या महिन्यात गजानन मारणे याची सुटका करण्यात आली होती. ८ वर्षानंतर गजानन मारणे हा तुरुंगाबाहेर आला आहे.
