अकोला (वृत्तसंस्था) अकोला जिल्ह्यातील दहीगाव गावंडे शेतशिवारात आठवडाभरापूर्वी एका 40 वर्षीय विधवा महिलेचा अर्धवट जळालेल्या अवस्थेत मृतदेह आढळून आला होता. या प्रकरणी पोलीस चौकशीत शाळेत जाणे बंद केल्याने सतत रागावते म्हणून 15 वर्षीय पोटच्या पोरानेच दगडाने ठेचून आईची हत्या केल्याचे समोर आल्यानंतर जिल्ह्यात प्रचंड खळबळ उडाली आहे. संगीता राजू रवाळे (वय ४० वर्ष रा. ब्राम्हणवाडा जि. वाशीम ह.मु. दहीगाव गावंडे, अकोला) असं या मृत महिलेचं नाव आहे.
जाणून घ्या…. आहे नेमकं प्रकरण?
अकोला जिल्ह्यातील बोरगाव मंजू पोलिस स्टेशन हद्दीतील ग्राम दहीगाव गावंडे येथील मृतक संगीता रवाळे हिच्या पतीचं निधन झालं असून, तिला दोन मुले आहेत. गेल्या तीन चार वर्षांपासून माहेरी म्हणजेच दहीगाव गावंडे इथे ती राहत होती. रविवार म्हणजे ४ जूनपासून संगिता ही गावातून बेपत्ता झाली होती. त्यानंतर मंगळवारी (६ जून) सायंकाळी दहीगाव गावंडे येथील शेतशिवारात एका खड्ड्यात तिचा मृतदेह काटेरी झुडुपात टाकलेल्या अवस्थेत आढळून आला होता. मृतदेह हा अर्धवट जळालेल्या अवस्थेत असल्याने तिचा खून केल्याचं स्पष्ट होतं. या हत्येचा तपास अकोला पोलिसांच्या स्थानिक गुन्हे शाखेने हाती घेतल्यानंतर आज संपूर्ण हत्येचा उलगडा झाल्यानंतर पोलीसानाही धक्का बसला. कारण संगीता हिच्याच पंधरा वर्षे पोटच्या मुलानेच आईची हत्या केल्याचं तपासात निष्पन्न झालं होतं.
…म्हणून संतापाच्या भरात आईला संपवलं !
मृतक संगीता हिच्याच मुलाला चौकशीसाठी बोलावून विश्वासात घेतले. त्यानंतर त्यांनी आपल्या आईची कट रचून हत्या केल्याचं पोलिसांना सांगितलं. त्याची आई त्याला अनेकदा ओरडायची, त्याच्यावर रागवायची. रागवायचं कारण म्हटल्या गेलं तर मारेकरी मुलांना शिक्षण सोडून दिलं, म्हणजेच शाळेत जाणे बंद केलं होतं. त्यामुळे शाळेत जाण्यासाठी आई नेहमी त्याला रागवायची. हत्येच्या दिवशी देखील आई आणि मुलामध्ये बाचाबाची झाली. वाद वाढल्यामुळे संतापाच्या भरात त्यानं आईला संपवलं. पोलीस चौकशीत मुलानं आईची हत्या केल्याचं कबूल केलं आहे.
कट रचून दगडाने डोक्यावर, तोंडावर व शरीरावर ठिकठिकाणी केले वार !
मृत संगीता ही कामासाठी पारसला रेल्वेने ये-जा करायची. दररोज प्रमाणे ४ जून रोजी देखील दहिगाव गावातुन शेत रस्ताने अन्वी मिर्झापुरमार्गे बोरगांव मंजू रेल्वे स्टेशनकडे जाण्यासाठी निघाली होती. संगीता ही रस्त्याच्या मधोमध म्हणजेच सामसूम शेत रस्त्यात पोहोचली असता, तिच्याच मुलाने येथे येत दगडाने आईच्या डोक्यावर, तोंडावर व शरीरावर ठिकठिकाणी वार खून केला. हत्येनंतर मृतदेह कोणाला दिसू नये मुलाने रस्ताच्या बाजुला असलेल्या नालीमध्ये मृतदेह टाकुन त्यावर काटेरी झुड़पे टाकुन झाकुन टाकले. पुढं ६ जून रोजी तिचा मृतदेह आढळून आला अन् संपूर्ण हत्याकांडाचा खुलासा झाला. दरम्यान, या घटनेनंतर परिसरात एकच खळबळ उडाली आहे. आरोपी मुलगा विधी संघर्ष अल्पवयीन आहे. आरोपी मुलास बोरगाव मंजू पोलिसांनी ताब्यात घेऊन पुढील कारवाई सुरु केली आहे.
