जळगाव (प्रतिनिधी) पेवर व काँक्रीट प्लेन्ट मशीनसाठी दिलेली अॅडव्हान्स रक्कम परत करावी म्हणून मुंबईतील व्यक्तीला जळगावातील एका हॉटेलमध्ये तब्बल पाच दिवस डांबून ठेवल्याची धक्कादायक घटना उघडकीस आली आहे.
या संदर्भात प्रसाद वसंत लिगे (वय ५२ वर्षे, धंदा. नोकरी, रा डी/३, ६०४, हायलैन्ड गार्डन, ढोकाळी, ठाणे), यांनी दिलेल्या फिर्यादीत म्हटले आहे की, दि. २८ नोव्हेंबर रोजी सायंकाळी साडेसहा ते ३ डिसेंबर रात्री ८ वाजेपर्यंत त्यांना रविंद्र माळी व राहुल सोनवणे (पूर्ण नाव माहित नाही, दोन्ही रा. जळगाव) या दोघांनी रोड पेवर मशिन व काँक्रीट प्लेन्ट मशीन करीता दिलेली अॅडव्हान्स रक्कम परत द्यावी, यासाठी धमकावून हॉटेल अशोका पॅलेस (नवीपेठ स्टेशन रोड) या ठिकाणी जबरदस्तीने डांबुन ठेवले होते. तसेच मानसिक व शारीरिक छळ केला, असेही लिगे यांनी तक्रारीत म्हटले आहे. या प्रकरणी गुरनं. ४३१/२०२३ भा.द.वि.कलम ३४३, ५०६, ३४ प्रमाणे गुन्हा दाखल करण्यात आला असून पुढील तपास स.फौ संजय बडगुजर हे करीत आहेत.
