एरंडोल (प्रतिनिधी) पुलाचा कठडा तोडून खासगी बस नाल्यात कोसळल्यामुळे दोन जण ठार तर १८ जण जखमी झाले. हा अपघात शनिवार, १६ सप्टेंबर रोजी सकाळी साडेसात वाजता एरंडोल तालुक्यातील पिंपळकोठानजीक झाला. मयतामध्ये मुकेशकुमार शंकरलाल गुर्जर (३७, रा. उदयपूर वाटी, राजस्थान, ह.मु. छत्रपती संभाजीनगर) यांच्यासह एका अनोळखी व्यक्तीचा समावेश आहे.
राजस्थानमधील नीम का थाना ते छत्रपती संभाजीनगर दरम्यान दररोज छत्रपती संभाजीनगर दरम्यान दररोज खासगी कंपनीची बस चालते. शनिवार, १६ सप्टेंबर रोजी ही ट्रॅव्हल्स छत्रपती संभाजीनगरकडे जात असताना एरंडोल तालुक्यातील पिंपळकोठानजीक एका पुलाच्या कठड्याला तोडून ती थेट नाल्यात कोसळली. यात मुकेशकुमार शंकरलाल गुर्जर यांच्यासह अन्य एक असे एकूण दोन जण ठार झाले. तर दुसऱ्याची ओळख पटलेली नव्हती. या अपघातात ट्रॅव्हल्सच्या दोन चालकांसह १६ प्रवासी असे एकूण १८ जण जखमी झाले.
दोन्ही मयतांचे मृतदेह जळगावात शासकीय वैद्यकीय महाविद्यालय व रुग्णालयात आणण्यात आले. यानंतर एका मयताचे नाव मुकेशकुमार गुर्जर असल्याचे समोर आले. मुकेशकुमार हे छत्रपती संभाजीनगर येथे टाईल्स बसविण्याचे काम करतात. ते कुटुंबाला भेटण्यासाठी गावी गेले. तीन गंभीर जखमींवर जळगावातील खासगी रुग्णालयात उपचार सुरू आहेत.
