जळगाव (प्रतिनिधी) शहरातील काशिनाथ चौक परिसरात झालेल्या मोटारसायकल चोरीचा गुन्हा एमआयडीसी पोलिसांनी उघडकीस आणत चोरीस गेलेली दुचाकी हस्तगत केली असून दोन आरोपींना अटक करण्यात आली आहे.
जळगाव तालुक्यातील धानोरा खुर्द येथील रहिवासी फिर्यादी शालिक पाटील हे त्यांच्या मालकीची हिरो होंडा सुपर स्प्लेंडर (क्रमांक MH19 AK 0207) ही दुचाकी घेऊन जळगाव शहरातील काशिनाथ चौक परिसरात कामानिमित्त आले होते. त्यांनी दुचाकी पार्क करून सामान खरेदीसाठी गेले असता परत आल्यानंतर दुचाकी दिसून न आल्याने अज्ञात इसमाने चोरी केल्याचे निदर्शनास आले. याबाबत एमआयडीसी पोलीस ठाण्यात गुन्हा क्रमांक 66/2026, भा.न्या.सं. 2023 चे कलम 303(2) अन्वये गुन्हा दाखल करण्यात आला होता.
या गुन्ह्याचा तपास करताना पोलिसांनी गुप्त बातमीदारांकडून माहिती मिळवून यावल पोलीस ठाण्याचे पोलीस निरीक्षक रंगनाथ धारबळे, पोलीस कॉन्स्टेबल परमेश्वर जाधव व राजेंद्र पाटील यांच्या मदतीने संशयित आरोपींचा शोध घेतला. यामध्ये आरोपी आतिष जितेंद्र पोथीवाल (रा. कांचन नगर, जळगाव) यास 1 फेब्रुवारी 2026 रोजी ताब्यात घेऊन चौकशी केली असता त्याने दुचाकी चोरीची कबुली दिली. तसेच हा गुन्हा त्याने त्याचा साथीदार गणेश लक्ष्मण कोळी (रा. साकेगाव, ता. भुसावळ) याच्या मदतीने केल्याचे सांगितले. त्यानुसार पोलिसांनी दोन्ही आरोपींना ताब्यात घेऊन त्यांच्याकडून चोरीस गेलेली दुचाकी हस्तगत केली. दोन्ही आरोपींना अटक करून न्यायालयात हजर केले असता न्यायालयाने त्यांना दोन दिवसांची पोलीस कोठडी सुनावली आहे.
ही कारवाई एमआयडीसी पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली गुन्हे शोध पथकाचे पोउनि राहुल तायडे, पोउनि चंद्रकांत धनके, पोह प्रमोद लाडवंजारी, पोहेकॉ गिरीश पाटील, पोना प्रदीप चौधरी, पोलीस कॉन्स्टेबल गणेश ठाकरे, राहुल घेटे व योगेश घुगे यांनी केली. या गुन्ह्याचा पुढील तपास पोलीस नाईक प्रदीप चौधरी व पोलीस कॉन्स्टेबल योगेश घुगे करीत आहेत. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे व पोलीस निरीक्षक बबन आव्हाड यांच्या मार्गदर्शनाखाली करण्यात आली.
