चाळीसगाव (प्रतिनिधी) – जळगाव जिल्हा पोलीस दलाच्या वतीने आयोजित पोलीस भरतीपूर्व प्रशिक्षण शिबिर आज चाळीसगाव येथील छत्रपती शिवाजी महाराज चौक मैदानावर उत्साहात पार पडले. या शिबिराला उपस्थित राहून पोलीस भरतीची तयारी करणाऱ्या तरुण-तरुणींशी संवाद साधत त्यांना मार्गदर्शन व प्रोत्साहन देण्यात आले.
या प्रशिक्षण शिबिरात प्रमुख वक्त्यांनी पोलीस भरती प्रक्रियेतील विविध टप्प्यांची सविस्तर माहिती दिली. यामध्ये मैदानी चाचणी, लेखी परीक्षा, आवश्यक कागदपत्रे तसेच भरती प्रक्रियेदरम्यान घ्यावयाची काळजी याबाबत मार्गदर्शन करण्यात आले. त्यामुळे भरतीची तयारी करणाऱ्या उमेदवारांना या शिबिरातून महत्त्वपूर्ण माहिती मिळाली.
यावेळी पोलीस अधीक्षक श्री. श्रीकांत धिवरे, उपविभागीय पोलीस अधिकारी श्री. विजयकुमार ठाकूर, परिविक्षाधीन पोलीस उपअधीक्षक श्रीमती सह्याद्री बिर्ले, चाळीसगाव शहर पोलीस निरीक्षक श्री. अमितकुमार मनेळ, नगराध्यक्षा सौ. प्रतिभा चव्हाण, उपनगराध्यक्ष श्री. हर्षल चौधरी यांच्यासह विविध पदाधिकारी, पोलीस अधिकारी आणि विद्यार्थी मोठ्या संख्येने उपस्थित होते.
ग्रामीण भागातील गुणवंत आणि होतकरू तरुण-तरुणींना योग्य मार्गदर्शन मिळावे तसेच त्यांना पोलीस भरतीसाठी समान संधी उपलब्ध व्हावी, या उद्देशाने अशा प्रशिक्षण उपक्रमांचे महत्त्व अधोरेखित करण्यात आले. चाळीसगाव तालुक्यातील जास्तीत जास्त तरुण-तरुणींनी या प्रशिक्षणाचा लाभ घ्यावा. त्यांच्या सरावासाठी आवश्यक सोयी-सुविधा आणि मदत उपलब्ध करून देण्यासाठी आपण प्रयत्नशील राहू, अशी ग्वाही यावेळी देण्यात आली.
“आज मैदानावर घाम गाळणारे तरुण उद्या महाराष्ट्र पोलीस दलात अभिमानाने सेवा करतील,” असा विश्वास व्यक्त करत सर्व प्रशिक्षणार्थींना उज्ज्वल भविष्यासाठी शुभेच्छा देण्यात आल्या.
या शिबिराच्या माध्यमातून पोलीस दलात भरती होण्याचे स्वप्न पाहणाऱ्या ग्रामीण भागातील युवक-युवतींना नवी दिशा, प्रेरणा आणि आत्मविश्वास मिळण्यास मदत झाली.
