जळगाव (प्रतिनिधी) : बारदान विक्रीच्या बहाण्याने जळगाव येथील एका व्यापाऱ्याला खऱ्या नोटांच्या बदल्यात सहा लाख रुपयांच्या भारतीय बच्चों का बँक असे लिहीलेल्या खेळण्यातील नोटा देत गंडविले. ही घटना दि. २३ जानेवारी रोजी उघडकीस आली. या धक्क्यामुळे व्यापाऱ्याची प्रकृती खालावली असून, त्यांना रुग्णालयात दाखल करावे लागले होते. उपचार घेतल्यानंतर त्यांनी रामानंद नगर पोलिसात तक्रार दिली असून त्यानुसार तिघांविरुद्ध गुन्हा दाखल करण्यात आला आहे.
शहरातील शनिपेठ प्रजापत नगरातील रहिवासी असलेले प्रकाश श्रीराम प्रजापत यांचा धरणगाव येथे बारदान विक्रीचा व्यवसाय आहे. त्यांना दहा बारा दिवसांपुर्वी रवींद्र तायडे नावाच्या व्यक्तीने फोन केला होता. आपल्याकडे २ लाख बारदान विक्रीसाठी असल्याचे त्याने सांगितले. दि. २३ जानेवारी रोजी रवींद्र तायडे एका साथीदारासह प्रजापत यांच्या घरी आला. यावेळी सोबत असलेल्या इसमाने त्या मोबाईलमधील बारदानचे फोटो दाखविल्यानंतर त्यांच्यात बारदान खरेदीबाबत बोलणी झाली आणि तीन रुपये नगप्रमाणे सहा लाख रुपयांत व्यवहार ठरला होता.
पाचशे रुपयांच्याच नोटा हव्यात
व्यवहार ठरल्यानंतर प्रकाश प्रजापत यांना रविंद्र तायडे याच्यासोबत असलेल्या व्यक्तीने पैसे दाखविण्यास सांगितले. त्यानुसार प्रजापत यांनी त्याला सहा लाख रुपये दाखवले. मात्र, त्या व्यक्तीने आम्हाला फक्त पाचशे रुपयांच्याच नोटा हव्या आहेत, असे सांगितले
पैसे बदलाविण्यासाठी नेले डीएसपी चौकात
रविंद्र तायडे यांच्यासोबत असलेल्या व्यक्तीने प्रकाश प्रजापत यांना पैसे बदलून देण्याच्या बहाण्याने डीएसपी चौकात नेले. त्याठिकाणी एका तिसऱ्या साथीदाराने प्रजापत यांच्याकडील एक लाख रुपये टोकन म्हणून घेतले आणि उरलेल्या ५ लाख रुपयांच्या शंभर आणि दोनशे रुपयांच्या नोटांच्या बदल्यात त्यांना पाचशेच्या नोटांचे १० बंडल एका पिशवीत दिले. पैसे बदलविल्यानंतर तिघांनी उद्या सकाळी ११ वाजता अजिंठा चौफुलीवर माल घ्यायला या. आणि त्यावेळी पाच लाख रुपये द्या असे म्हणत ते पसार झाले.
पिशवी उघडली अन् धक्काच बसला !
दुसऱ्या दिवशी जेव्हा प्रजापत यांनी घरी पैसे तपासले, तेव्हा त्यांना धक्काच बसला. प्रत्येक बंडलच्या वरची फक्त एक नोट खरी होती. आणि बाकी सर्व नोटांवर ‘भारतीय बच्चो का बँक’ आणि ‘पांचसौ नंबर’ असे लिहिलेले होते. आपली फसवणूक झाल्याचे लक्षात येताच तणावामुळे प्रजापत यांची तब्येत बिघडली. त्यांना तातडीने रुग्णालयात दाखल करण्यात आले होते.
प्रकृतीत सुधारणा झाल्यानंतर दिली तक्रार
प्रकृतीत सुधारणा झाल्यानंतर प्रकाश प्रजापत यांनी दि. २ रोजी पोलीस ठाण्यात धाव घेत तक्रार दिली. त्यानुसार संशयित रवींद्र तायडे आणि त्याच्या साथीदारांविरुद्ध फसवणुकीचा गुन्हा दाखल करण्यात आला आहे. तपास सपोनि संदीप पाटील हे करीत आहे.
