जळगाव (प्रतिनिधी) – पाळधी ते तरसोद बायपास महामार्गावरील पाळधी येथील रेल्वे उड्डाणपुलाच्या दुरुस्तीसाठी साईड गर्डरचा मोठा तुकडा उचलण्याचे काम सुरू असताना सुमारे १०० फूट उंचीवर असलेली क्रेन थेट खाली कोराळली. या दुर्घटनेत क्रेन चालकाचा मृत्यू झाला आहे. तसेच क्रेन कोसळल्यामुळे उड्नुाणगुठाणा संरक्षण भिंतीचेही मोठे नुकसान झाले आहे. या घटनेमुळे परिसरात एकच खळबळ उडाली असून, बायपास महामार्गावरील सुरू असलेल्या कामाच्या दर्जाबाबत आणि सुरक्षिततेच्या उपाययोजनांबाबत पुन्हा एकदा गंभीर प्रश्न उपस्थित झाले आहेत.
मधुकर धनराज पाटील (४४, रा. वंजारी खपाट, ता धरणगाव), असे अपघातातील मृताचे नाव आहे. पाळधी गावाजवळील रेल्वे उड्डाणपुलाच्या दुरुस्तीचे काम काही दिवसांपासून सुरू आहे. या कामाचा एक साईड गर्डरचा तुकडा क्रेनच्या सहाय्याने उचलण्यात येत होता. त्याच वेळी क्रेन अंदाजे १०० उंचावरून खाली कोसळली. उंचीवरून क्रेन कोसळल्याने हा अपघात अत्यंत भीषण होता. या घटनेत क्रेन चालकाचा मृत्यू झाला आहे. तांत्रिक बिघाडा बाबतची अधिकृत माहिती अद्याप स्पष्ट झालेली नाही.
मधुकर पाटील याला तातडीने रुग्णवाहिकाने जळगांव जिल्हा रुग्णालयात दाखल करण्यात आले आहे. या वेळी काही काळ वाहतूक विस्कळीत झाली होती. घटनास्थळी पाळधी पोलीस चौकीचे स. पो.नि.गणेश कोते यांनी धाव घेऊन मदत कार्य सुरू केले व वाहतूक सुरळीत केली.घटनेची माहिती मिळताच प्रतापराव पाटील यांनी ही धाव घेऊन जिल्हा रुग्णालयात मयताच्या कुटुंबीयांना धीर दिला.
दुरुस्ती रखडल्याने गैरसोय
पाळधी ते तरसोद बायपास हा जळगाव परिसरातीत वाहतुकीच्या दृष्टीने महत्वाचा मार्ग आहे. या महामार्गावरून दररोज मोठ्या प्रमाणात वाहने येजा करतात. मात्र, उड्डाणपुलांच्या दुरूस्तीमुळे एकेरी वाहतूक सुरू असल्याने वाहनचालकांना अनेक अडचणींचा सामना करावा लागत आहे. याच महामार्गावर तीन महिन्यात १२ जणांचा बळी गेले आहे. त्यामुळे या घटनांमुळे महामार्गावरील सुरक्षिततेचा प्रश्न पुन्हा ऐरणीवर आला आहे.
उड्डाणपुलाच्या कामावर प्रश्नचिन्ह
पाळधी ते तरसोद बायपास महामार्गावरील रेल्वे उड्डाणपुलाच्या कामाबाबत या पुर्वच सवाल उपस्थित केला जात होता. आता पाळधी जवळ दुरूस्तीचे काम सुरू असताना केन कोसळल्याच्या घटनेने या प्रश्नांना पुन्हा तोंड फुटले आहे. उड्डाणपुलाच्या बांधकामात नेमक्या कोणत्या त्रुटी राहिल्या आहेत. दुरुस्तीची गरज का निर्माण झाली आणि काम करताना आवश्यक सुरक्षा नियमांचे पालन केले जात आहे का? असा सवाल आता उपस्थित होत आहे. भराव खचल्याने गेल्या तीन महिन्यांपासून महामार्गावर एकेरी वाहतूक सुरू आहे. परिणामी, वाहन चालकांना वाहतूक कोंडी होत आहे.
